The National Salvation Party holds a ceremony to receive defectors from the Norodom Ranariddh Party ចលនា​ប្រជាធិបតេយ្យ​សង្គ្រោះ​ជាតិ ធ្វើ​ពិធី​ទទួល​សមាជិក​ពី​គណបក្ស នរោត្តម រណឫទ្ធិ​

90% of members of the NRP in Kampot province defected to the National Salvation Party.

ថ្ងៃទី 25 សីហា 2012, | 

ដោយ: លីនណា  CEN

ភ្នំពេញ: ​សមាជិក​គណបក្ស នរោត្តម រណឫទ្ធិ ខេត្តកំពត ប្រមាណ ៩០​ភាគរយ ត្រូវបាន​ដឹកនាំ​ឲ្យ​ចូលរួម​ជាមួយ​ចលនា​ប្រជាធិបតេយ្យ​សង្គ្រោះ ដោយ​ប្រធាន​ក្រុមការងារ​គណបក្ស នរោត្តម រណឫទ្ធិ ប្រចាំ​ខេត្តកំពត​។​

​ លោក ប៉ុល ហំ​ម អនុប្រធាន​គណៈកម្មកា​រ​បណ្ដោះអាសន្ន នៃ​គណបក្ស​សង្គ្រោះ​ជាតិ បាន​ឲ្យ​ដឹងថា "​នៅ​ព្រឹក​ថ្ងៃទី​២៥ ខែសីហា ឆ្នាំ​២០១២ នៅ​ខេត្តកំពត យើង​មាន​ធ្វើ​ពិធី​ទទួល​សមាជិក​ថ្មី មកពី​គណបក្ស នរោត្តម រណឫទ្ធិ ដែល​ដឹកនាំ​ដោយ​លោក ម៉ៅ រតនា ប្រធាន​ក្រុមការងារ​គណបក្ស នរោត្តម រណឫទ្ធិ ប្រចាំ​ខេត្តកំពត​។​

​ជាមួយគ្នានេះ លោក ម៉ៅ រតនា បាន​និយាយ​ដែរ​ថា ការចាកចេញ​ពី​គណបក្ស នរោត្តម រណឫទ្ធិ ដោយសារតែ​សម្ដេចក្រុមព្រះ នរោត្តម រណឫទ្ធិ បាន​លាឈប់​ពី​ឆាកនយោបាយ និង​ដោយសារ​រូបលោក បាន​ដើរ​តាម​ការដឹកនាំ​របស់​ស​ម្ដេច​ក្រុមព្រះ តាំងពី​ឆ្នាំ​១៩៩២ មកម្ល៉េះ​។

​លោក ប៉ុល ហំ​ម [ម៉ៅ រតនា?] បាន​បញ្ជាក់ថា “​នៅពេលដែល​សម្ដេចក្រុមព្រះ លោក​លាឈប់​អ៊ីចឹងទៅ ខ្ញុំ​ត្រូវតែ​សម្រេចចិត្ត​មួយ ចូលរួម​គាំទ្រ​ជាមួយនឹង​ចលនា​ប្រជាធិបតេយ្យ​សង្គ្រោះ​ជាតិ ដែល​អនាគត​ដ៏​ខ្លី​ខាងមុខនេះ នឹង​ក្លាយជា​គណបក្ស​ថ្មី​មួយ ឈ្មោះថា គណបក្ស​សង្គ្រោះ​ជាតិ ដោយ​យល់ឃើញថា រួបរួម​អ្នកប្រជាធិបតេយ្យ បូក​ជាមួយនឹង​អ្នកស្នេហាជាតិ ដែល​យើង​នឹង​ទទួលបាន​ជោគជ័យ ក្នុងការ​បោះឆ្នោត​នាពេល​ដ៏​ខ្លី​ខាងមុខ ក្នុង​ឆ្នាំ​២០១៣”​។​

​លោក ម៉ៅ រតនា បាន​ឲ្យ​ដឹងថា នៅក្នុង​ការចូល​រួមជាមួយ​ចលនា​ប្រជាធិបតេយ្យ​សង្គ្រោះ​ជាតិ នៅពេលនេះ មាន​អតីត​សមាជិក​គណបក្ស នរោត្តម រណឫទ្ធិ  និង​ថ្នាក់ដឹកនាំ​សំខាន់ ប្រចាំ​ខេត្តកំពត មាន​ប្រមាណ​ជា ៩០​ភាគរយ​។​

​លោក សៅ រ៉ានី ប្រធាន​គណបក្ស​ជាតិនិយម ដែល​ទើប​ប្តូរ​ឈ្មោះ​មកពី​គណបក្ស​នរោត្តម រណឫទ្ធិ កាលពី​ថ្ងៃទី​២៤ ខែសីហា ឆ្នាំ​២០១២ បាន​ចេញមក​ផ្តល់​បទសម្ភាសន៍ ជាមួយ​ក្រុម​អ្នករាយការណ៍​ព័ត៌មាន ដោយបាន​បញ្ជាក់​យ៉ាងនេះ​ថា "​ខ្ញុំ​មិន​បដិសេធថា អត់​មាន​អ្នក​ចាក​ចេញពី​គណបក្ស​នេះ​ទេ គឺមាន​តែ​ជា​ឆន្ទៈ​របស់គេ ហើយ​ខាង​គណបក្ស​សមរង្ស៊ី និង​សិទ្ធិមនុស្ស ក៏មាន​រាប់រយ​នាក់ ដែល​ចូលមក​ជាមួយ​យើងខ្ញុំ​ដែរ តែ​យើង​មិនទាន់​ធ្វើការ​ប្រកាស​ធំដុំ ទទួល​ពួកគាត់​នៅឡើយ​"​។​

​លោក សៅ រ៉ានី បាន​មានប្រសាសន៍​បន្តថា “​នេះ​ជា​ទិដ្ឋភាព​នយោបាយ​មួយ តែ​ការពិត​នៅតែ​ជាការ​ពិត​អ៊ីចឹង ថ្នាក់ដឹកនាំ​ខេត្តកំពត ទាំង​ស្រុក ទាំង​ខេត្ត មក​ចូលរួម​សមាជ​នៅ​នេះ​អស់ហើយ ថ្ងៃនេះ ប៉ុន្តែ​ខ្ញុំ​មិន​បដិសេធថា អត់​ទេ គឺមាន​តិចតួច ដែលជា​សមាជិក​គាំទ្រ​ទេ មិនមែនជា​ថ្នាក់ដឹកនាំ រចនាសម្ព័ន្ធ​គណបក្ស​ទេ ពីព្រោះ​សមា​ជិ​គាំទ្រ ចេញចូល​វា​អត់​មាន​ស្ថិតស្ថេរ​ទេ ថ្ងៃនេះ​ចូល​ខាង​នេះ ថ្ងៃនោះ​ចូល​ខាង​នោះ ប៉ុន្តែ​រចនាសម្ព័ន្ធ មិនបាន​ទៅ​ទេ គឺ​ទៅ​មានតែ​ម្នាក់ ពីរ​នាក់ អាហ្នឹង​ខ្ញុំ​ទទួលស្គាល់​”៕​