ដោយ អ៊ុក សាវបូរី
2014-03-13 RFA
សកម្មភាពពលរដ្ឋនៅព្រំដែនជួលដីស្រែចម្ការឲ្យជនជាតិវៀតណាម ដាំដុះ កំពុងកើនឡើងនៅឃុំកំពង់ក្រសាំង ស្រុកបូរីជលសារ ខេត្តតាកែវ។ អ្នកស្រុកអះអាងថា បានជាគាត់ជួលដី ព្រោះតម្លៃស្រូវចុះថោក និងខ្វះកម្លាំងពលកម្ម។ ម្យ៉ាងទៀត អ្នកស្រុកខ្វះលុយសងថ្លៃជី ថ្លៃប្រេង ថ្លៃទិញទឹកស្រោចស្រូវ ជាដើម។ បញ្ហាជួលដីឲ្យបរទេសធ្វើកសិកម្មនេះ អាជ្ញាធរជាតិខាងព្រំដែន បានហាម ព្រោះវាអាចប៉ះពាល់ការកំណត់ចរចាបោះបង្គោលព្រំដែននាពេលអនាគត។
ដីខ្មែរស្រែវៀតណាម កំពុងត្រូវបានមនុស្សជាច្រើននិយាយតគ្នានៅក្នុងតំបន់មិនឆ្ងាយពីព្រំដែនកម្ពុជា-វៀតណាម ក្នុងខេត្តតាកែវ ខណៈអ្នកភូមិនៅទីនោះផ្អើលជួលដីច្រើនហិកតារ ឲ្យកសិករវៀតណាម ដាំដុះ។
ប្រធានសហគមន៍ភូមិសង្គមមានជ័យ ឃុំកំពង់ក្រសាំង ស្រុកបូរីជលសារ លោក វី ចាន់ អះអាងថា មានបញ្ហាច្រើនដែលនាំឲ្យអ្នកភូមិសម្រេចចិត្តឈប់ធ្វើស្រែ ហើយជួលដី។ ទី១ គឺដីកសិកម្មធំពេក ធ្វើមិនអស់ដី។ ទី២ ខ្វះកម្លាំងពលកម្ម។ ទី៣ ស្រូវចុះថោក មិនសមាមាត្រថ្លៃទិញជី ប្រេង និងថ្លៃទឹក។ ទន្ទឹមនោះ មន្ត្រីច្រើនស្ថាប័ននៅច្រកព្រំដែនយកពន្ធពីឈ្មួញចូលទិញស្រូវខ្ពស់ពេក នាំឲ្យឈ្មួញទម្លាក់តម្លៃទិញស្រូវ៖ «បើដីនៅនោះមានត្រឹម ១.០០០ហិកតារ វៀតណាម ធ្វើ ៨០០ហិកតារ ហើយ ខ្មែរធ្វើបានតែ ២០ហិកតារ»។
ពលរដ្ឋនៅភូមិសង្គមមានជ័យ លោក កែវ ខា ឲ្យដឹងថា គាត់មានដីកសិកម្ម ២០ហិកតារ។ គាត់ជួលដីឲ្យវៀតណាម ធ្វើស្រែ ១៥ហិកតារ ឯ ៥ហិកតារទៀត គាត់ធ្វើខ្លួនឯង។ លោកថា បានជាគាត់សម្រេចចិត្តជួលដី ព្រោះគាត់មិនអាចធ្វើស្រែអស់ដីទេ។ លោកថា ការជួលដីនោះ គឺគាត់ងាយស្រួលប្រមូលលុយ ព្រោះដីស្រែគាត់ជួលបានថ្លៃ អាចដាំស្រូវបាន ២ដង ទើបវៀតណាម ឲ្យថ្លៃដី ១ហិកតារ ៣០០ ទៅ ៣៥០ដុល្លារ៖ «១ហិកតារ គិតជាលុយដុង បើដីល្អវា ៧លានដុង បើដីអាក្រក់ អាចជា ៥លានទេ»។
លោក សំ មិត្ត អ្នកភូមិសង្គមមានជ័យ ដែរ ឲ្យដឹងថា គាត់ជួលដីឲ្យវៀតណាម ចំនួន ៥ហិកតារ។ ក្នុង១ហិកតារ វៀតណាម ឲ្យថ្លៃ ៨០ម៉ឺនដុង គឺប្រហែល ១៣ម៉ឺនរៀល ព្រោះដីគាត់ធ្វើស្រែបានតែ១ដងក្នុង១រដូវទឹកស្រក។ លោកថា ដីស្រែគាត់ជួលនោះ នៅឆ្ងាយពីព្រំដែន ៣ ទៅ ៥គីឡូម៉ែត្រ គឺដីមិននៅកៀកព្រំដែនទេ។ លោកថា លុយជួលដីគាត់ត្រូវបង់ឲ្យសមត្ថកិច្ចចម្រុះ ២០ម៉ឺនរៀល ក្នុងដីជួល១ហិកតារ។ លោកកំពុងសុំឲ្យសមត្ថកិច្ចបញ្ចុះតម្លៃពន្ធដីជួលនោះខ្លះ៖ «សំខាន់បំផុត អ្នកមានដីច្រើន គេជួលឲ្យវៀតណាម ទាំងអស់ ដីខ្មែរស្រែយួនតំបន់ហ្នឹង»។
ជំទប់ទី១ឃុំកំពង់ក្រសាំង លោក ច្រុង គឹមយ៉ាង ថ្លែងថា អ្នកភូមិក្នុងឃុំនោះបានជួលដីឲ្យវៀតណាម ធ្វើស្រែប្រមាណ ២០ ទៅ ៣០ហិកតារ។ ហើយក៏មានកសិករខ្មែរខ្លះបានជួលវៀតណាម ឲ្យបង្រៀនបច្ចេកទេសដាំដុះប្រចាំម៉ោង ដើម្បីឲ្យផលស្រូវកើនដល់ ១០តោនក្នុងដី១ហិកតារ។ លោកថា អាជ្ញាធរមិនអនុញ្ញាតឲ្យអ្នកភូមិជួលដីឲ្យកសិករវៀតណាម ធ្វើស្រែទេ ព្រោះការជួលដីនោះអាចមានបញ្ហានៅថ្ងៃក្រោយ រវាងព្រំដែនកម្ពុជា និងវៀតណាម។ ប៉ុន្តែ អ្នកស្រុកជំពាក់លុយវៀតណាម ដែលទិញជី និងប្រេងច្រើនពេក ទើបអាជ្ញាធរបិទភ្នែកខ្លះ៖ «យើងមិនចង់ឲ្យជួលទេ ព្រោះវៀតណាម ហើយខ្មែរវាមានបញ្ហាចេះតែថា លក់ដីឲ្យយួន ស្អីៗឲ្យយួន តែតាមពិត អ្នកបងប្អូនគាត់សុំជួលរបស់គាត់ទេ»។
ក្រុមប្រឹក្សាខេត្តតាកែវ លោក ម៉ៅ សុផល ថ្លែងថា បញ្ហាប្រជាពលរដ្ឋជួលដីឲ្យវៀតណាម ធ្វើស្រែចម្ការបានកើតឡើងយូរហើយ ដោយសារតែមាននាយទុនទៅទិញដីនៅព្រំដែន ហើយជួលឲ្យវៀតណាម ទើបពលរដ្ឋតាមព្រំដែនធ្វើតាមក្រុមនាយទុន។ លោកថា ទង្វើនោះអាចនឹងមានការរំកិលព្រំដែនចូលមកក្នុងទឹកដីខ្មែរដែរ ព្រោះបង្គោលព្រំដែនរវាងកម្ពុជា និងវៀតណាម មិនទាន់កំណត់បោះអស់នៅឡើយ។
អនុប្រធានលេខាធិការដ្ឋានអចិន្ត្រៃយ៍នៃអាជ្ញាធរជាតិ លើកិច្ចការព្រំដែន អ្នកស្រី កុយ ពិសី ថ្លែងនៅថ្ងៃទី១៦ ខែមករា ឆ្នាំ២០១៤ កន្លងទៅថា គោលការណ៍រដ្ឋាភិបាលមិនដែលអនុញ្ញាតឲ្យអ្នកភូមិខ្មែរជួលដីឲ្យវៀតណាម ដើម្បីធ្វើស្រែធ្វើចម្ការទេ ពីព្រោះវាពិបាកនៅក្នុងការចរចាបោះបង្គោលព្រំដែន៕
No comments:
Post a Comment