Opposition parties criticised FM Hor Namhong's meeting with Thai FM because it won't gives Cambodia any benefits.
ដោយ ម៉ម មុនីរតន៍ 2012-12-21 RFA
លោក ហោ ណាំហុង រដ្ឋមន្ត្រីក្រសួងការបរទេសកម្ពុជា
គ្រោងនឹងទៅចូលរួមកិច្ចប្រជុំគណៈកម្មការចម្រុះមួយ
តាមការអញ្ជើញរបស់រដ្ឋមន្ត្រីក្រសួងការបរទេសថៃ នៅថ្ងៃអង្គារ ទី២៥
ខែធ្នូ ឆ្នាំ២០១២ ខាងមុខនេះ។
រដ្ឋមន្ត្រីក្រសួងការបរទេសកម្ពុជា លោក ហោ
ណាំហុង ផ្ដល់បទសម្ភាសន៍ដល់អ្នកកាសែត នៅឯក្រសួងការបរទេស
នារាជធានីភ្នំពេញ នៅថ្ងៃទី១៩ ខែមករា ឆ្នាំ២០១១។
កិច្ចប្រជុំនេះធ្វើឡើងដើម្បីពង្រឹងកិច្ចសហការល្អនៅក្នុង
តំបន់រវាងកម្ពុជា និងថៃ។
ក៏ប៉ុន្តែមន្ត្រីបក្សប្រឆាំងចាត់ទុកកិច្ចប្រជុំនេះថានឹងមិននាំ
ផលចំណេញណាមួយសម្រាប់កម្ពុជា នោះទេ។
មន្ត្រីជាន់ខ្ពស់ក្រសួងការបទេស
និងសហប្រតិបត្តិការអន្តរជាតិកម្ពុជា
នឹងទៅចូលរួមក្នុងកិច្ចប្រជុំគណៈកម្មការចម្រុះទ្វេភាគីលើកទី៨
រយៈពេលមួយថ្ងៃ ជាមួយប្រទេសថៃ ក្នុងសប្ដាហ៍ខាងមុខនេះ។
សេចក្ដីប្រកាសព័ត៌មានរបស់ក្រសួងការបទេសកម្ពុជា
ដែលចេញផ្សាយនៅថ្ងៃទី២០ ខែធ្នូ ឆ្នាំ២០១២ ឲ្យដឹងថា លោក ហោ ណាំហុង
រដ្ឋមន្ត្រីក្រសួងការបរទេសកម្ពុជា
នឹងដឹកនាំគណៈប្រតិភូទៅចូលរួមក្នុងកិច្ចប្រជុំគណៈកម្មការចម្រុះ
ទ្វេភាគីរវាងកម្ពុជា និងថៃ នៅថ្ងៃទី២៥ និងគ្រោងបញ្ចប់នៅថ្ងៃទី២៦
ខែធ្នូ ឆ្នាំ២០១២។
បន្ថែមលើសេចក្ដីប្រកាសព័ត៌មាននេះ លោក កុយ គួង
មន្ត្រីនាំពាក្យក្រសួងការបរទេសកម្ពុជា មានប្រសាសន៍នៅថ្ងៃទី២០
ខែធ្នូ ថាកិច្ចប្រជុំនេះផ្ដោតលើរបៀបវារៈទូទៅ
ដើម្បីពង្រឹងកិច្ចសហប្រតិបត្តិការក្នុងតំបន់៖ «កិច្ចប្រជុំនោះ
គឺផ្ដោតសំខាន់លើកិច្ចសហប្រតិបត្តិការទ្វេភាគីរវាងប្រទេសទាំងពីរ
គឺផ្ដោតទៅលើកិច្ចសហប្រតិបត្តិការលើវិស័យទូទៅដែលយើងមានកន្លងមក
នោះ គឺវិស័យទេសចរណ៍ ពាណិជ្ជកម្ម វិនិយោគ ហើយវិស័យផ្សេងៗទៀត»។
ក៏ប៉ុន្តែ លោក ជា ប៉ូច អ្នកតំណាងរាស្ត្រគណបក្ស សម រង្ស៊ី បញ្ជាក់ថា
គេហាក់មានជំនឿតិចតួចប៉ុណ្ណោះពីកិច្ចប្រជុំនេះ
ដែលរកឃើញថាកម្ពុជា ត្រូវចំណេញលើផ្នែកការទូត
និងតំបន់ជាមួយប្រទេសថៃ នោះ។ លោកបន្តថា ព្រោះកន្លងមកកម្ពុជា
តែងស្ថិតក្រោមសម្ពាធនៃការរិះគន់ថា
តែងចាញ់ប្រៀបនយោបាយរបស់ប្រទេសថៃ ជាដរាប៖ «រដ្ឋមន្ត្រីក្រសួងការ
បរទេសធ្វើយ៉ាងណាក៏ដោយ នៅតែចាញ់ប្រៀបនៅប្រទេសថៃ ជានិច្ច។
អ៊ីចឹងហើយ ក្នុងនាមខ្ញុំជាគណបក្សប្រឆាំងមួយរូប
គឺខ្ញុំតែងតែតាមដានសភាពការណ៍នៅព្រំដែននេះ គឺយើងមិនដែលឈ្នះ។
យើងមិនចង់ឈ្នះចង់ចាញ់អីទេ
ប៉ុន្តែយើងចាញ់ប្រៀបនៃការចរចាជានិច្ច»។
បដិសេធទៅនឹងការយល់ឃើញនេះ លោក កុយ គួង ចាត់ទុកថា
អ្នកតំណាងរាស្ត្រគណបក្សជំទាស់រូបនេះទំនងមិនបានយល់ពីជម្រៅនៃ
របៀបធ្វើការរបស់រដ្ឋាភិបាលកម្ពុជា នោះទេ។ លោក កុយ គួង បញ្ជាក់ថា
កិច្ចប្រជុំគណៈកម្មការចម្រុះនេះ កម្ពុជា
មិនមែនធ្លាប់អនុវត្តជាមួយតែប្រទេសថៃ នោះទេ
ពោលគឺកិច្ចប្រជុំរបៀបនេះ កម្ពុជា
ធ្លាប់ធ្វើរួចមកហើយជាមួយបណ្ដាប្រទេសក្នុងតំបន់ រួមមាន ឡាវ
ម៉ាឡេស៊ី និងប្រទេសជប៉ុន ជាដើម។
លោក រ៉ុង ឈុន សមាជិកក្រុមប្រឹក្សាឃ្លាំមើលកម្ពុជា គិតថា
អ្វីដែលកម្ពុជា តែងចាញ់ប្រៀបនឹងប្រទេសថៃ នោះ
ដោយសារប្រសិទ្ធភាពនៃទំនាក់ទំនងការទូតរបស់កម្ពុជា
នៅមានកម្រិតនៅឡើយ។ លោកបន្តថា បញ្ហានេះដែលកម្ពុជា
ត្រូវធ្វើកំណែទម្រង់បន្ថែមទៀត
ដើម្បីជំរុញល្បឿនការទូតរបស់ខ្លួនឲ្យដល់កម្រិតលើឆាកអន្តរជាតិ
និងតំបន់៖ «យើងត្រូវបង្ហាញនូវឥទ្ធិពលរបៀបការទូតផងដែរ
អ្វីដែលយើងចាញ់ប្រៀបគេហ្នឹង
ដោយសារតែការទំនាក់ទំនងការទូតរបស់កម្ពុជា
យើងជាមួយបណ្ដាប្រទេសនៅលើពិភពលោក ដូចជាមហាអំណាច
ដូចជាអង្គការសហប្រជាជាតិអីអើ
យើងនៅមានទំនាក់ទំនងការទូតមិនដល់ប្រទេសសៀម
អាហ្នឹងហើយដែលយើងមានអើចំណុចខ្សោយជាងគេ»។
ចំណែកសេចក្តីប្រកាសព័ត៌មានរបស់ក្រសួងការបរទេសកម្ពុជា
ដែលចេញផ្សាយនៅថ្ងៃទី២០ ខែធ្នូ បញ្ជាក់ថា
គោលបំណងនៃកិច្ចប្រជុំនេះ
គឺដើម្បីពង្រឹងកិច្ចសហប្រតិបត្តិការរវាងកម្ពុជា និងថៃ
ដែលធ្វើឡើងនៅទីក្រុងបាងកក។ សេចក្ដីប្រកាសព័ត៌មានបញ្ជាក់ទៀតថា
ការចូលរួមក្នុងកិច្ចប្រជុំនេះ
គឺជាការឆ្លើយតបលិខិតអញ្ជើញរបស់លោក ស៊ូរ៉ាពង់ តុវីចាក់ចៃគូល
(Surapong Tovichakchaikul) រដ្ឋមន្ត្រីក្រសួងការបរទេសថៃ។
បើតាមគម្រោង លោក ហោ ណំាហុង គ្រោងនឹងជួបសន្ទនាជាមួយអ្នកស្រី យីងឡាក់
នាយករដ្ឋមន្ត្រីថៃ ថែមទៀត បន្ទាប់ពីកិច្ចប្រជុំត្រូវបិទបញ្ចប់៕
No comments:
Post a Comment