A Change of Guard

សូមស្តាប់វិទ្យុសង្គ្រោះជាតិ Please read more Khmer news and listen to CNRP Radio at National Rescue Party. សូមស្តាប់វីទ្យុខ្មែរប៉ុស្តិ៍/Khmer Post Radio.
Follow Khmerization on Facebook/តាមដានខ្មែរូបនីយកម្មតាម Facebook: https://www.facebook.com/khmerization.khmerican

Saturday, 16 July 2016

តំណាងរាស្ត្រ​បក្ស​ប្រឆាំង​រក​ឃើញ​ចំណុច​ដែល​វៀតណាម​រំលោភ​មក​កម្ពុជា​៧​កន្លែង

តំណាងរាស្ត្រ​បក្ស​ប្រឆាំង​រក​ឃើញ​ចំណុច​ដែល​វៀតណាម​រំលោភ​មក​កម្ពុជា​៧​កន្លែង
ដោយ សេក បណ្ឌិត
2015-06-27

ព្រំដែន កណ្ដាល ៦២០
តំណាងរាស្ត្រ​បក្ស​សង្គ្រោះ​ជាតិ យុវជន និង​ព្រះសង្ឃ ចុះ​ពិនិត្យ​តំបន់​ព្រំដែន​ក្នុង​ស្រុក​កោះធំ ខេត្ត​កណ្ដាល កាល​ពី​ថ្ងៃ​ទី​២០ មិថុនា ឆ្នាំ​២០១៥ ដោយ​មាន​ក្រុម​សមត្ថកិច្ច​តាម​ឃ្លាំ​មើល។
RFA/Sek Bandith


អ្នក​តំណាងរាស្ត្រ​បក្ស​ប្រឆាំង​ដែល​សកម្ម​ក្នុង​ការ​ឃ្លាំមើល​បញ្ហា​ព្រំដែន​បាន​អះអាង​ថា មក​ដល់​ពេល​នេះ គេ​រក​ឃើញ​ចំណុច​ជម្លោះ​ដែល​វៀតណាម រំលោភ​មក​ខាង​កម្ពុជា មាន​យ៉ាង​តិច ៧​កន្លែង តាម​ខ្សែ​បន្ទាត់​ព្រំដែន​នៃ​ប្រទេស​ទាំង​ពីរ។ ស្រប​ពេល​គ្នា​នេះ​ដែរ បក្ស​ប្រឆាំង​ជំរុញ​ឲ្យ​រដ្ឋាភិបាល​យក​បញ្ហា​ព្រំដែន​នេះ​ប្ដឹង​ទៅ​តុលាការ​អន្តរជាតិ​ឲ្យ​បាន​ឆាប់។

នៅ​សប្ដាហ៍​ក្រោយ​នេះ ក្រុម​អ្នក​តំណាងរាស្ត្រ​មក​ពី​គណបក្ស​សង្គ្រោះ​ជាតិ នឹង​ផ្ញើ​លិខិត​ជា​ផ្លូវការ​ទៅ​រដ្ឋាភិបាល​របស់​លោក​នាយករដ្ឋមន្ត្រី ហ៊ុន សែន ដោយ​ស្នើ​ឲ្យ​លើក​យក​បញ្ហា​វៀតណាម រំលោភ​ព្រំដែន​កម្ពុជា ទៅ​តុលាការ​អន្តរជាតិ (ICJ)។



អនុ​ប្រធាន​គណបក្ស​សង្គ្រោះ​ជាតិ និង​ជា​អនុ​ប្រធាន​ទី​១ នៃ​រដ្ឋ​សភា លោក កឹម សុខា ចាត់​ទុក​បញ្ហា​ព្រំដែន​គឺ​ជា​អាយុ​ជីវិត​ស្លាប់​រស់​របស់​ជាតិ។ លោក​សាទរ​ចំពោះ​ចំណាត់​ការ​របស់​រដ្ឋាភិបាល​តាម​រយៈ​ការ​ចេញ​កំណត់​ទូត ក៏ប៉ុន្តែ​ការ​ចេញ​កំណត់​ទូត​នេះ មិន​ទាន់​គ្រប់គ្រាន់​ទេ​សំខាន់​រដ្ឋាភិបាល​ចាំបាច់​ត្រូវ​ប្រើប្រាស់​យន្តការ​ច្បាប់​អន្តរជាតិ​ដែល​មាន​តម្លៃ​ជា​សាកល ដើម្បី​ជំរុញ​ឲ្យ​វៀតណាម គោរព​នូវ​អធិបតេយ្យភាព និង​បូរណភាព​ទឹកដី​របស់​ប្រទេស​កម្ពុជា។

លោក កឹម សុខា៖ «យើង​លើក​ទឹក​ចិត្ត​ថា រដ្ឋាភិបាល​បាន​ធ្វើ​ហើយ ប៉ុន្តែ​កំណត់​ទូត​នេះ វា​មិន​បាន​ផ្លែផ្កា ទាល់​តែ​រដ្ឋាភិបាល​ចាប់​ប្រើប្រាស់​ផ្សេង​ទៀត ជាពិសេស​យន្តការ​អន្តរជាតិ នៅ​លើ​សន្ធិសញ្ញា​អន្តរជាតិ»។

ស្រប​ពេល​ជាមួយ​គ្នា​នេះ​ដែរ ក្រុម​អ្នក​តំណាងរាស្ត្រ​គណបក្ស​សង្គ្រោះ​ជាតិ បាន​ចេញ​សេចក្ដី​ថ្លែងការណ៍​ចុះ​ថ្ងៃ​ទី​២៥ ខែ​មិថុនា របស់​ខ្លួន ដោយ​ទទូច​ឲ្យ​ក្រសួង​ការបរទេស កំណត់​កាលបរិច្ឆេទ​ច្បាស់លាស់​ឲ្យ​ភាគី​វៀតណាម ឆ្លើយ​តប​រឿង​កំណត់​ទូត។ ទាមទារ​ឲ្យ​រដ្ឋាភិបាល​ផ្ដល់​ផែនទី​ដែល​ប្រើប្រាស់​សម្រាប់​ការ​បោះ​បង្គោល​ព្រំដែន និង​ស្នើ​ឲ្យ​រដ្ឋសភា​កោះ​ប្រជុំ​អនុម័ត​លុប​សន្ធិសញ្ញា​បំពេញ​បន្ថែម​ឆ្នាំ​២០០៥។

ចំណែក​អ្នក​តំណាងរាស្ត្រ​មណ្ឌល​សៀមរាប លោក អ៊ុំ សំអាន បាន​ឲ្យ​ដឹង​ដែរ​ថា នៅ​សប្ដាហ៍​ទី​២ នៃ​ខែ​កក្កដា ក្រុម​តំណាងរាស្ត្រ​គណបក្ស​សង្គ្រោះ​ជាតិ នឹង​ដាក់​លិខិត​មួយ​ទៀត​ទៅ​រដ្ឋាភិបាល​ស្នើ​សុំ​ផ្អាក​បោះ​បង្គោល​ព្រំដែន​បណ្ដោះអាសន្ន និង​សូម​បង្ហាញ​ឲ្យ​ច្បាស់​ពី​តំបន់​ណា​ដែល​ដី​កម្ពុជា លយ​ចូល​វៀតណាម ឬ​វៀតណាម លយ​ចូល​មក​កម្ពុជា ព្រម​ឲ្យ​បង្ហាញ​ឈ្មោះ​ភូមិ​ខ្មែរ​នៅ​តំបន់​ណា​ខ្លះ ឬ​ស្រុក​ខេត្ត​ណា​ខ្លះ​ដែល​ត្រូវ​កាត់​ទៅ​ឲ្យ​វៀតណាម គ្រប់គ្រង និង​ភូមិ​វៀតណាម​ណា​ខ្លះ​ដែល​ត្រូវ​កាត់​ឲ្យ​មក​ខ្មែរ​វិញ​ជា​លក្ខណ​ដោះដូរ​ដើម្បី​សម្រួល​ខ្សែ​បន្ទាត់​ព្រំដែន​តាម​រូប​ភាពជា​ធ្មេញ​រណា មុន​នឹង​សម្រេច​បោះ​បង្គោល​ព្រំដែន​ជា​ផ្លូវការ​នោះ។

លោក អ៊ុំ សំអាន បន្ត​ថា ចំពោះ​ការ​សុំ​ផ្អាក​បោះ​បង្គោល​ព្រំដែន​បណ្ដោះអាសន្ន​នោះ គឺ​មាន​រយៈពេល​កំណត់​មួយ​ច្បាស់លាស់ ដើម្បី​ទុក​ពេល​ចរចា​ដោះស្រាយ​ជាមួយ​ភាគី​វៀតណាម ឲ្យ​បាន​ម៉ត់ចត់ និង​ត្រូវ​រៀបចំ​បង្កើត​គណៈកម្មការ​ព្រំដែន​ចម្រុះ​មួយ​ដែល​មាន​សមាសភាព​មក​ពី​គណបក្ស​ជាប់​ឆ្នោត​ដែល​មាន​អាសនៈ​ក្នុង​រដ្ឋ​សភា​រួម​គ្នា​ធ្វើ​ការងារ​នេះ​ដោយ​តម្លាភាព។

លោក អ៊ុំ សំអាន៖ «ពេល​បង្កើត​គណៈកម្មការ​នេះ​បាន​ហើយ ពេល​នោះ​គឺ​អាច​បោះ​បង្គោល​ព្រំដែន​បាន​ហើយ បើ​បង្កើត​គណៈកម្មការ​នេះ​អត់​ចេញ​ទេ គឺ​សូម​ឲ្យ​រង់ចាំ​រហូត​ដល់​ក្រោយ​ការ​បោះ​ឆ្នោត​ជាតិ​ឆ្នាំ​២០១៨ បើ​បោះ​ឥឡូវ​វា​ខាត គឺ​ត្រូវ​ចាំ​មាន​រយៈពេល​សមរម្យ​ដោះស្រាយ​រួច​ត្រឹមត្រូវ​ចាំ​បោះ​វា​មិន​យូរ​ប៉ុន្មាន​ទេ»។

ឆ្លើយ​តប​នឹង​សំណើ​នេះ ប្រធាន​គណៈកម្មាធិការ​ទទួល​បន្ទុក​កិច្ចការ​ព្រំដែន​នៃ​ទីស្ដីការ​គណៈរដ្ឋមន្ត្រី ​លោក វ៉ា គឹមហុង មាន​ប្រសាសន៍​នៅ​ថ្ងៃ​ទី​២៦ ខែ​មិថុនា ថា លោក​មិន​អត្ថាធិប្បាយ​យ៉ាង​ណា​ទេ ដោយ​រង់ចាំ​ទទួល​បាន​លិខិត​ស្នើ​នោះ​ជា​ផ្លូវការ​សិន។ ប៉ុន្តែ​លោក​គិត​ថា សំណើ​ទាំង​នេះ​វា​ហួស​ពី​សមត្ថភាព​លោក ហើយ​វា​អាច​ជា​ការ​សម្រេច​របស់​ប្រមុខ​រដ្ឋាភិបាល។ ចំណែក​ការ​ស្នើ​សុំ​ឲ្យ​ភាគី​វៀតណាម ឆ្លើយ​តប​តាម​កំណត់​ទូត​មក​កម្ពុជា វិញ ឲ្យ​បាន​លឿន ឬ​ត្រូវ​កំណត់​ឱសានវាទ​ទៅ​សម​ភាគី​របស់​ខ្លួន​យ៉ាង​ណា​នោះ​គឺ​មិន​អាច​ទៅ​រួច​ទេ។

លោក វ៉ា គឹមហុង ពន្យល់​ថា ការ​ស្នើ​បែប​នេះ គឺ​ខុស​នឹង​របៀប​របប​ការទូត៖ «ប្រទេស​ធំ​ណាៗ​ក៏​ដូច​តែ​គ្នា​ទេ គឺ​ទុក​ឲ្យ​គេ​ឆ្លើយ​តប​ទៅ​តាម​បែបបទ​ការទូត ហើយ​រឿង​ដែល​ចង់​ទៅ ICJ ឬ​អង្គការ​សហប្រជាជាតិ សូម​ឲ្យ​ពិចារណា​មែនទែន មិន​មែន​ដូច​ទៅ​ដើរ​លេង​ផ្សារ​ថ្មី​ទេ ទៅ​តុលាការ​ត្រូវ​មាន​ឯកសារ​ត្រឹមត្រូវ»។

តំណាងរាស្ត្រ​គណបក្ស​ប្រឆាំង អះអាង​ថា ការ​រំលោភ​បំពាន​គឺ​មាន​ស្ទើរ​គ្រប់​ទីកន្លែង​នៅ​តាម​បណ្តាយ​ព្រំដែន​កម្ពុជា-​វៀតណាម គឺ​មាន​នៅ​តំបន់​តន់ហន់ ខេត្ត​កំពត នៅ​ភ្នំដិន ខេត្ត​តាកែវ នៅ​ស្រុក​រំដួល ខេត្ត​ស្វាយរៀង នៅ​ភូមិ​អន្លង់ជ្រៃ ស្រុក​ពញាក្រែក ដែល​ជា​ភូមិ​លោក ហេង សំរិន ប្រធាន​រដ្ឋ​សភា និង​ស្រុក​មេមត់ ខេត្ត​ត្បូងឃ្មុំ នៅ​ភូមិ​ឡំ ខេត្ត​រតនគិរី និង​នៅ​ស្រុក​កោះធំ ខេត្ត​កណ្ដាល ជាដើម។ ក្នុង​តំបន់​ទាំង​នេះ កន្លែង​ខ្លះ​បាន​បោះ​បង្គោល​ព្រំដែន​ជា​ផ្លូវ​ការ​រួច​ហើយ។

រាល់​ការ​តវ៉ា​របស់​ប្រជាពលរដ្ឋ​​នៅ​តាម​តំបន់​ទាំង​នេះ និង​តំណាងរាស្ត្រ​មក​ពី​គណបក្ស​ប្រឆាំង​ពុំ​ទាន់​មាន​លទ្ធផល​ណា​មួយ​ជា​ដុំ​កំភួន ឬ​បាន​ដី​ដែល​បាត់​មក​វិញ ឬ​ក៏​វៀតណាម ដក​ចេញ​ពី​ទីតាំង​ដែល​ពលរដ្ឋ​កម្ពុជា ចោទ​ថា វៀតណាម​កំពុង​រំលោភ​លើ​បូរណភាព​ដែនដី ភូមិឋាន​របស់​ពួកគាត់​នោះ​នៅ​ឡើយ​ទេ រហូត​មក​ដល់​ពេល​នេះ។

លោក​នាយករដ្ឋមន្ត្រី ហ៊ុន សែន កាល​ពី​ពេល​ថ្មីៗ​នេះ​បាន​ទទូច​ឲ្យ​រដ្ឋាភិបាល​វៀតណាម គោរព​បូរណភាព​ទឹក​ដី​ខ្មែរ​នៅ​តំបន់​ទាំង​នោះ​ផង ហើយ​កាល​ពី​ថ្ងៃ​ទី​២៣ មិថុនា ក្នុង​ជំនួប​ជាមួយ​អនុរដ្ឋមន្ត្រី​ការបរទេស​វៀតណាម លោក ឡេ ហ្វា ទ្រុង (Le Hoai Trung) រដ្ឋមន្ត្រី​ការបរទេស​កម្ពុជា លោក ហោ ណាំហុង ក៏​បាន​ក្រើនរំលឹក​រដ្ឋាភិបាល​វៀតណាម ជា​ថ្មី​ទៀត​អំពី​បញ្ហា​នេះ។ យ៉ាង​ណា​ក៏ដោយ រហូត​មក​ទល់​ពេល​នេះ រដ្ឋាភិបាល​វៀតណាម មិន​ទាន់​បាន​ឆ្លើយ​តប​ផ្លូវ​ការ​ចំពោះ​កំណត់​ទូត​របស់​កម្ពុជា នៅ​ឡើយ​ទេ។ លោក ឡេ ហ្វា ទ្រុង ប្រាប់​លោក ហោ ណាំហុង ថា ថ្នាក់ដឹកនាំ​វៀតណាម កំពុង​រង់ចាំ​របាយការណ៍​ពី​អាជ្ញាធរ​មូលដ្ឋាន​របស់​ពួកគេ​ជា​មុន​សិន។

យ៉ាង​ណា​ក៏ដោយ លោក វ៉ា គឹមហុង ឲ្យ​ដឹង​ថា គណៈកម្មាធិការ​ចម្រុះ​ទទួល​បន្ទុក​កិច្ចការ​ព្រំដែន​កម្ពុជា វៀតណាម គ្រោង​នឹង​ជួប​ប្រជុំ​គ្នា​រយៈពេល​បី​ថ្ងៃ នៅ​ក្រុង​សៀមរាប នៅ​ដើម​ខែ​កក្កដា ខាង​មុខ​នេះ ដើម្បី​ពិភាក្សា​ដោះស្រាយ​បញ្ហា​ដែល​នៅ​សេសសល់​ពាក់ព័ន្ធ​នឹង​បញ្ហា​កំណត់​បោះ​បង្គោល​ព្រំដែន​នៃ​ប្រទេស​ទាំង​ពីរ។ លោក​បញ្ជាក់​ថា កិច្ចប្រជុំ​នេះ​ជា​សក្ខីភាព​មួយ​បញ្ជាក់​ថា រដ្ឋាភិបាល​កម្ពុជា មិន​បាន​ព្រងើយ​កន្តើយ​ចំពោះ​បញ្ហា​ព្រំដែន​នេះ​ឡើយ។

ទោះ​យ៉ាង​នេះ​ក្តី អ្នក​ស្រាវជ្រាវ​បញ្ហា​សង្គម លោក កែម ឡី បង្ហាញ​ថា ការ​ពឹង​ផ្អែក​លើ​រដ្ឋាភិបាល​កម្ពុជា អោយ​ដោះស្រាយ​បញ្ហា​ព្រំដែន​កម្ពុជា-​វៀតណាម ដែល​មាន​ភាព​មិន​ប្រក្រតី​នោះ គឺ​មិន​អាច​ទៅ​រួច​ទេ ពីព្រោះ​ការ​បណ្ដោយ​ឲ្យ​វៀតណាម ទន្ទ្រាន​វាទី​ទឹកដី​មក​លើ​កម្ពុជា គឺ​ជា​កំហុស​ឆ្គង​ធ្ងន់ធ្ងរ​របស់​រដ្ឋាភិបាល​ហើយ​កាន់​តែ​លង់ខ្លួន​ជ្រៅ​ទៅៗ។

លោក​ថ្លែង​បែប​នេះ ក្រោយ​ពី​លោក​បាន​ធ្វើ​ដំណើរ​ទស្សន​កិច្ច​មើល​ខ្សែបន្ទាត់​ព្រំដែន​នៅ​ច្រក​ជៀសឫស្សី ស្ថិត​ក្នុង​ស្រុក​ស្វាយជ្រំ ខេត្ត​ស្វាយរៀង និង​នៅ​ច្រក​ទ្វារ​តំបន់​ស្វាយអាង៉ោង ស្ថិត​ក្នុង​ស្រុក​កំពង់ត្របែក ខេត្ត​ព្រៃវែង ជាប់​ព្រំដែន​វៀតណាម ជាមួយ​ព្រះសង្ឃ និង​យុវជន​ប្រមាណ ៥០​នាក់ កាល​ពី​ថ្ងៃ​ទី​២៥ ខែ​មិថុនា។ អ្នក​ម្ចាស់​ស្រុក​បាន​ឲ្យ​ដឹង​ថា តំបន់​នេះ​កំពុង​មាន​ការ​រំលោភ​ព្រំដែន​ពី​វៀតណាម គួរ​ឲ្យ​ព្រួយបារម្ភ។

​លោក កែម ឡី បន្ត​ថា លោក​នឹង​សរសេរ​របាយការណ៍​បច្ចុប្បន្នភាព​មួយ​ស្ដីពី​បញ្ហា​ព្រំដែន​រវាង​កម្ពុជា-​វៀតណាម ដោយ​ភ្ជាប់​ជាមួយ​ឯកសារ​ប្រវត្តិសាស្ត្រ​ផង ថ្វាយ​ជូន​ព្រះមហាក្សត្រ​សម្ដេច​ព្រះ​បរមនាថ នរោត្តម សីហមុនី ទ្រង់​ជ្រាប និង​ចូលរួម​ដោះស្រាយ​នៅ​ពេល​ដ៏​ឆាប់​ខាង​មុខ​នេះ៕

1 comment:

Anonymous said...


Any time is the right time to raise concerns about the border issues with the evil Yuon Vietnam.

Thank You the CNRP's MPs for your unrelenting efforts to save Cambodia.

Bun Thoeun