កូនៗលោក ហ៊ុន សែន ចាត់ទុករបាយការណ៍អង្គការគ្លបលវីនេសជាការបំផ្លាញគ្រួសារលោក
ដោយ ឡេង ម៉ា
លោក ហ៊ុន ម៉ាណែត មេបញ្ជាការរងកងទ័ពជើងគោក និងជានាយរងសេនាធិការចម្រុះនៃកងយោធពលខេមរភូមិន្ទ ក្នុងពិធីរៀបចំការចូលប្រឡងជ្រើសរើសនាយទាហាន កាលពីថ្ងៃទី២០ ខែធ្នូ ឆ្នាំ២០១៥។
RFA/Brach Chev
សមាជិករបស់លោកនាយករដ្ឋមន្ត្រី ហ៊ុន សែន បញ្ចេញប្រតិកម្មចំពោះរបាយការណ៍របស់អង្គការ គ្លបល វីនេស (Global Witness) ដោយចាត់ទុកថាជារបាយការណ៍បង្ខូចកិត្តិយសក្រុមគ្រួសារត្រកូល "ហ៊ុន"។ ក៏ប៉ុន្តែមន្ត្រីសង្គមស៊ីវិលនិយាយថា ការឆ្លើយតបរបស់សមាជិកគ្រួសារត្រកូល "ហ៊ុន" នៅក្នុងហ្វេសប៊ុក មិនទាន់ឆ្លើយពេញលេញចំពោះរបាយការណ៍នេះនៅឡើយទេ។
ប្រតិកម្មនេះ ធ្វើឡើងភ្លាមៗបន្ទាប់ពីបណ្ដាញសារព័ត៌មានជាតិ និងអន្តរជាតិចេញផ្សាយព្រមៗគ្នានូវរបាយការណ៍របស់អង្គការឃ្លាំមើលពិភពលោកឈ្មោះ គ្លបល វីនេស (Global Witness) ដែលបង្ហាញថា ត្រកូល "ហ៊ុន" កំពុងកាន់កាប់ក្រុមហ៊ុន និងភាគហ៊ុនដោយសម្ងាត់ និងចំហជាច្រើន ព្រមទាំងមានការបំពានច្បាប់នៅប្រទេសកម្ពុជា។
លោក ហ៊ុន ម៉ានិត កូនប្រុសលោក ហ៊ុន សែន ចូលរួមពិធីប្រារព្ធខួបលើកទី៦៥ នៃការបង្កើតគណបក្សប្រជាជនកម្ពុជា កាលពីថ្ងៃទី២៨ ខែមិថុនា ឆ្នាំ២០១៦។ RFA/Brach Chev
កូនប្រុសរបស់លោកនាយករដ្ឋមន្ត្រី ហ៊ុន សែន គឺលោក ហ៊ុន ម៉ានិត ប្រតិកម្មក្នុងទំព័រហ្វេសប៊ុករបស់លោកថា របាយការណ៍នេះគ្មានការពិត និងបង្ខូចគ្រួសារលោក៖ «នេះជាការវាយប្រហារលើគ្រួសារត្រកូល ហ៊ុន ដែលជាការរៀបចំ និងកិច្ចសហការដ៏ល្អរវាង គ្លបល វីនេស ខេមបូឌា ដេលី (Cambodia Daily) និងភ្នំពេញប៉ុស្តិ៍ (Phnom Penh Post) ដោយស្ដែងចេញពីគោលបំណងយ៉ាងច្បាស់។ ដូចសព្វដង ព័ត៌មាននេះពោរពេញទៅដោយកំហុស និងព័ត៌មានមិនពិត ក្នុងគោលបំណងតែមួយគត់ គឺបង្អាប់ និងបង្ខូចកិត្តិយសគ្រួសារត្រកូល ហ៊ុន...»។
រីឯកូនស្រីរបស់លោក គឺអ្នកស្រី ហ៊ុន ម៉ាណា ក៏បានឆ្លើយតបក្នុងទំព័រហ្វេសប៊ុករបស់អ្នកស្រីដែរ ដោយសរសេរថា ការផ្សាយរបាយការណ៍បែបនេះ ជួយឲ្យឪពុកអ្នកស្រីឈ្នះឆ្នោតគ្រប់អាណត្តិទៅវិញទេ៖ «នាងខ្ញុំសូមអរគុណចំពោះ គ្លបល វីនេស ដែលបានចំណាយពេលយ៉ាងច្រើន ដើម្បីស្រាវជ្រាវពីក្រុមគ្រួសារត្រកូល ហ៊ុន។ នាងខ្ញុំបានដឹងយ៉ាងច្បាស់ថា ពួកអ្នកចង់បានអ្វីពីគ្រួសារយើងខ្ញុំ គឺឲ្យតែជិតដល់ពេលបោះឆ្នោតម្តងៗ ពួកអ្នកតែងតែធ្វើរឿងបែបនេះ ក្នុងគោលដៅបំផ្លាញឪពុករបស់នាងខ្ញុំ តែនាងខ្ញុំ និងគ្រួសារគួរតែអរគុណដល់អស់លោកលោកស្រី ដែលបានជួយដល់ឪពុករបស់នាងខ្ញុំឲ្យឈ្នះឆ្នោតគ្រប់អាណត្តិ ព្រោះតែការភូតភរ ការប្រមាថរបស់លោកអ្នក ធ្វើឲ្យអ្នកបោះឆ្នោតកាន់តែមានការទុកចិត្ត និងបោះឆ្នោតជូនឪពុកខ្ញុំថែមទៀត។ នាងខ្ញុំក៏សូមកោតសរសើរផងដែរដល់ភ្នំពេញប៉ុស្តិ៍ និង ខេមបូឌា ដេលី ដែលបានចេញផ្សាយព័ត៌មាននេះក្នុងពេល និងថ្ងៃតែមួយ ដែលបង្ហាញឲ្យឃើញថា មានកិច្ចសហការដ៏ល្អរវាងសារព័ត៌មានទាំងពីរជាមួយ គ្លបល វីនេស ដើម្បីបំផ្លាញដល់កិត្តិយសគ្រួសារត្រកូល ហ៊ុន សូមអស់លោកលោកស្រី បន្តកិច្ចការបែបនេះតទៅទៀតចុះ ប្រសិនគ្មានការងារធ្វើ»។
អគ្គនាយិកាទូរទស្សន៍បាយ័នអ្នកស្រី ហ៊ុន ម៉ាណា ចូលរួមពិធីបុណ្យសពលោក ជា ស៊ីម។
កូនច្បងរបស់លោកនាយករដ្ឋមន្ត្រី ហ៊ុន សែន គឺលោក ហ៊ុន ម៉ាណែត បានបញ្ចេញប្រតិកម្មចំពោះរបាយការណ៍នេះ ក្រោយប្អូនៗរបស់លោក ដោយកត់សម្គាល់ពីភាពចម្លែកថា ការផ្សាយអត្ថបទតែមួយជួនគ្នា បង្ហាញពីការសហការគ្នាដ៏ល្អក្នុងរឿងនេះរវាងភ្នំពេញប៉ុស្តិ៍ និង ខេមបូឌា ដេលី ហើយលើកនេះមិនត្រឹមវាយតែឪពុករបស់លោកទេ គឺវាយគ្រួសារលោកតែម្ដង៖ «ខ្ញុំនៅចាំបានថា ប៉ុន្មានអាណត្តិហើយ ឲ្យតែពេលជិតបោះឆ្នោត គឺជាពេលវេលាដែលអង្គការមួយឈ្មោះ Global Witness បង្កើតរឿងប្លែកៗ ឬប្រធានបទដដែលៗ ដើម្បីចោទប្រកាន់ និងវាយប្រហារមកលើរាជរដ្ឋាភិបាល ជាពិសេសលើឪពុកខ្ញុំតែម្ដង។ ហើយលើកនេះក៏មិនមានអ្វីថ្មីដែរ... គ្រាន់តែខុសត្រង់ថា តាមរយៈការផ្សាយអត្ថបទតែមួយជួនគ្នា (បង្ហាញពីការសហការគ្នាដ៏ល្អក្នុងរឿងនេះ) រវាង Phnom Penh Post និង Cambodia Daily លើកនេះ គឺមិនត្រឹមវ៉ៃតែឪពុករបស់ខ្ញុំនោះទេ គឺគេបានបង្កើតរឿងវ៉ៃទាំងគ្រួសារតែម្ដង ពោលគឺមិនឲ្យរួចខ្លួនម្នាក់ណាឡើយ។ ចាំមើលចេញរឿងអ្វីទៀត?»។
ដោយឡែកលោកនាយករដ្ឋមន្ត្រី ហ៊ុន សែន មិនបានធ្វើអត្ថាធិប្បាយអ្វីឆ្លើយតបនឹងរបាយការណ៍របស់អង្គការឃ្លាំមើលពិភពលោក គ្លបល វីនេស ទេ ប៉ុន្តែលោកផ្សាយបន្តសាររបស់កូនៗ។ លោកថា «ថ្ងៃនេះកូនប្រុសកូនស្រីរបស់លោក បានបញ្ចេញសមត្ថភាពរបស់ពួកគេលើបណ្ដាញសង្គមហ្វេសប៊ុក ដែលលោកសូមយកខ្លឹមសារនេះមកផ្សាយបន្តតាម Page របស់លោក»។
នេះជាប្រតិកម្មដំបូងរបស់សមាជិកគ្រួសារត្រកូល "ហ៊ុន" ទៅនឹងរបាយការណ៍របស់អង្គការឃ្លាំមើលពិភពលោក គ្លបល វីនេស។
របាយការណ៍របស់អង្គការឃ្លាំមើលពិភពលោក គ្លបល វីនេស ដែលចេញផ្សាយនៅព្រឹកថ្ងៃទី៧ កក្កដា រំឭកថា អង្គការនេះបានសរសេរលិខិតទៅសមាជិកត្រកូល ហ៊ុន ចំនួន ២៧រូប កាលពីខែមករា ប៉ុន្តែមិនមានអ្នកឆ្លើយតបទេ លើកលែងតែលោក សុខ ពុទ្ធិវុធ ដែលជាស្វាមីកូនស្រីពៅរបស់លោកនាយករដ្ឋមន្ត្រី គឺអ្នកស្រី ហ៊ុន ម៉ាលី បានឆ្លើយតបតាមអ៊ីមែលយ៉ាងវែងមួយ កាលពីថ្ងៃទី៨ ខែកុម្ភៈ។
ទាក់ទងនឹងការឆ្លើយតបរបស់សមាជិកគ្រួសារត្រកូល ហ៊ុន ទៅនឹងរបាយការណ៍របស់អង្គការឃ្លាំមើលពិភពលោក គ្លបល វីនេស ដោយចាត់ទុកថា ជារបាយការណ៍មិនពិត និងមានបំណងបង្ខូចគ្រួសារត្រកូល ហ៊ុន ត្រូវបាននាយកប្រតិបត្តិនៃមជ្ឈមណ្ឌលសិទ្ធិមនុស្សកម្ពុជា អ្នកស្រី ចក់ សុភាព យល់ឃើញថា នៅកម្ពុជា មានបញ្ហាចំពោះតម្លាភាព និងលទ្ធភាពនៃការទទួលបានព័ត៌មាន។
អ្នកស្រីបន្តថា បញ្ហានេះក៏ជាបញ្ហាមួយដែលធ្វើឲ្យពលរដ្ឋ និងសាធារណជនមិនដឹងថាត្រូវផ្ទៀងផ្ទាត់ព័ត៌មាននេះដូចម្ដេចទេ ព្រោះពួកគាត់តែងតែឃ្លាំមើលមន្ត្រីសាធារណៈ ហើយរាយការណ៍អំពីបញ្ហា៖ «សម្រាប់មន្ត្រីសាធារណៈ ខ្ញុំគិតថា សម្រាប់ការធានានូវកិត្តិយស ធានានូវភាពត្រឹមត្រូវរបស់គាត់ គាត់អាចបង្ហាញនូវភាពត្រឹមត្រូវរបស់គាត់តាមរយៈការបកស្រាយណាមួយឲ្យសាធារណជនបានឃើញ ជាជាងការគ្រាន់តែយើងបដិសេធថា នោះជារបាយការណ៍មួយដែលធ្វើឡើងដើម្បីបង្ខូច ឬក៏អំពើបន្តុះបង្អាប់ដល់រដ្ឋាភិបាល ព្រោះកន្លងមកយើងឃើញថា របាយការណ៍ច្រើនណាស់ មិនមែនតែរបាយការណ៍ គ្លបល វីនេស ទេ។ របាយការណ៍អង្គការសង្គមស៊ីវិលក្នុងស្រុកក្ដីអីហ្នឹង ច្រានចោលពីសំណាក់រដ្ឋាភិបាល។ អ៊ីចឹងខ្ញុំគិតថា វាទាមទារនូវការបកស្រាយជាមួយគ្នា បើសិនជាមានការរាយការណ៍បែបហ្នឹង។ បើវាមិនពិត យើងអាចបង្ហាញថា វាមិនពិតត្រង់ចំណុចណា ហើយខ្ញុំគិតថាវាគោលការណ៍ក្នុងសង្គមមួយ ដែលមានតម្លាភាព»។
អនុសាសន៍របស់អង្គការ គ្លបល វីនេស សម្រាប់រដ្ឋាភិបាលកម្ពុជា បានស្នើទី១ ឲ្យមានការស៊ើបអង្កេតដោយឯករាជ្យ និងតម្លាភាព ចំពោះការចោទប្រកាន់ទាំងឡាយណាដែលមាននៅក្នុងរបាយការណ៍ ដែលមានចំណងជើងថា "អាណាចក្រសាជីវកម្មនៃគ្រួសារអ្នកកាន់អំណាចត្រកូល ហ៊ុន" ហើយផ្ដន្ទាទោសជន និងក្រុមហ៊ុនទាំងឡាយណាដែលបំពានច្បាប់។ ទី២ ស្នើបញ្ឈប់អំពើគាបសង្កត់ រួមមាន បញ្ឈប់អំពើធ្វើទុក្ខបុកម្នេញដល់អ្នករិះគន់រដ្ឋាភិបាល លុបចោលផែនការធ្វើច្បាប់ទាំងឡាយណាដែលគាបសង្កត់សិទ្ធិសេរីភាពពលរដ្ឋ និងមោឃភាពច្បាប់ទាំងឡាយណាដែលគាបសង្កត់សិទ្ធិសេរីភាពពលរដ្ឋ ហើយទី៣ សម្រាប់សមាជិកគ្រួសារត្រកូល ហ៊ុន ទាំងអស់ រួមទាំងលោកនាយករដ្ឋមន្ត្រី ហ៊ុន សែន ផង របាយការណ៍នេះស្នើឲ្យប្រកាសទ្រព្យសម្បត្តិទាំងអស់ និងទំនាក់ទំនងជាមួយក្រុមហ៊ុនក្នុងស្រុក និងក្រៅប្រទេស៕
2 comments:
according to a former facebook product manager , the nouveau riche are buying lands to build private compounds secluded from the general public for fear of uprising by the people and the have-nots-- in US probably, it will start with race war -- white police kill black again, in cambodia probably those who lost their land/home and china workers are starting strike against corporation [ walmart , today ] .. the rich are also buying private airplanes for quick get away when the riots begin. he also stated that the CEO of facebook is building a 6 feet tall wall fence around his 100 millions dollars property in hawaii to keep people out and some others are buying lands as far as new zealand to run and hide when mass civil unrest and economic collapse occurs.... the end game must be getting near .. these wealthy leeches are getting ready to jump off the ship which they have steered into an iceberg.
Keep going Ah Kouk HUN !!
Khmer Chit Roleuy Heuy !!
Post a Comment