ព្រះតេជគុណ ប៊ុត ប៊ុនតិញនៅក្នុងកិច្ចពិភាក្សាមួយកាលពីពេលកន្លងមក។ រូបថត ហ្វេសប៊ុក
ប៊ុត ប៊ុនតិញ៖ វិបត្តិនយោបាយអាចដោះស្រាយបានបើអ្នកនយោបាយឈប់អួត
Fri, 15 July 2016 ppp
សូ វិសាល
(តពីលេខមុន)...បើទោះបីជាស្ថានភាពនយោបាយនៅក្នុងប្រទេសកម្ពុជាបច្ចុប្បន្នហាក់បីដូចជាកាន់តែឡើងកម្តៅខ្លាំងឡើងហើយអ្នកនយោបាយនៅតែមិនទាន់អាចរកច្រកដោះស្រាយបានយ៉ាងណាក៏ដោយ ក៏ព្រះតេជគុណ ប៊ុត ប៊ុនតិញ ដែលជាប្រធានបណ្តាញព្រះសង្ឃឯករាជ្យដើម្បីយុត្តិធម៌សង្គមមានសង្ឃដីកាថាស្ថានការណ៍នយោបាយដែលកំពុងតែឡើងកម្តៅដែលផ្តើមចេញដោយសារតែអ្នកនយោបាយបង្កឡើងដើម្បីផលប្រយោជន៍បក្ស និងផលប្រយោជន៍បុគ្គលនេះគឺអាចដោះស្រាយបានប្រសិនបើអ្នកនយោបាយខ្មែរឈប់អួតហើយត្រូវលះបង់គំនិតដែលចាត់ទុកប្រទេសមួយនេះជាកម្មសិទ្ធិរបស់ខ្លួន។
ព្រះតេជគុណ ប៊ុនតិញ គឺជាសកម្មជនព្រះសង្ឃមួយអង្គដែលតែងតែមានភាពសកម្មយ៉ាងខ្លាំងក្នុងការចូលរួមធ្វើកិច្ចការសង្គមដូចលោក បណ្ឌិត កែម ឡី ដែលទើបតែត្រូវបានខ្មាន់កាំភ្លើងបាញ់សម្លាប់កាលពីថ្ងៃទី ១០ ខែកក្កដានេះតែងតែមានសង្ឃដីកាធ្វើការរិះគន់ខ្លាំងៗទៅលើភាពអសកម្មរបស់រដ្ឋាភិបាល។
បើមើលពីប្រវត្តិរបស់ព្រះសង្ឃអង្គនេះដោយសារតែស្ថានភាពគ្រួសារមានភាពក្រីក្រខ្លាំងពេកហើយមានឆន្ទៈចង់រៀនបន្តទៀតនៅទីបំផុតយុវជន ប៊ុនតិញ បានសម្រេចចិត្តទៅបួសនៅថ្ងៃទី ៥ ខែឧសភា ឆ្នាំ ២០០០ នៅវត្តវ៉ារិន ស្រុកវ៉ារិន ខេត្តសៀមរាបដែលគិតមកដល់ត្រឹមខែកក្កដាឆ្នាំ ២០១៦ នេះព្រះតេជគុណបួសបាន ១៦ ព្រះវស្សាហើយ។ ដោយសារតែបួសហើយគង់នៅវត្តវ៉ារិនពុំមានឱកាសបានរៀនសូត្រព្រះតេជគុណក៏បានសម្រេចចិត្តចាកចេញពីវត្តនេះទៅគង់នៅវត្តដំណាក់ក្នុងក្រុងសៀមរាបទើបមានឱកាសបានរៀនសូត្របន្តទៀត។
ព្រះតេជគុណមានសង្ឃដីកាថា៖ « អរគុណវត្តដំណាក់ដែលជាវត្តមួយស្អាតស្អំគឺព្រះសង្ឃដែលមកគង់វត្តដំណាក់គឺត្រូវតែរៀន បើអង្គណាមួយអត់ទៅរៀន ៣ ថ្ងៃអត់ឲ្យនៅវត្តនឹងទេ។ ដូច្នេះនៅក្នុងវត្តនឹងគេបង្ខំយើងឲ្យរៀនរហូតដល់យើងបានក្លាយជាអ្នកចេះដឹងចម្រើនពរ»។
នៅក្នុងឆ្នាំ ២០០៣ ព្រះតេជគុណ ប៊ុនតិញ បានទទួលអាហារូបករណ៍ទៅរៀននៅសាកលវិទ្យាល័យបុមបៃប្រទេសឥណ្ឌាហើយនៅថ្ងៃទី ១៥ ខែមករា ឆ្នាំ ២០០៥ ទើបបានចូលរៀននៅសាកលវិទ្យាល័យនោះ។
ព្រះតេជគុណបានខិតខំរៀនសូត្ររហូតដល់បញ្ចប់ការសិក្សាទទួលបានសញ្ញាបត្រ អនុបណ្ឌិត ផ្នែកសង្គមវិទ្យានៅថ្ងៃទី ១៩ ខែមេសាឆ្នាំ ២០១១។ «អាត្មារៀនសង្គមវិទ្យាតាំងពីឌីប្លូមបានបរិញ្ញាបត្រសង្គមវិទ្យា អនុបណ្ឌិតសង្គមវិទ្យាអត់ដូរទេទៅត្រង់ពីព្រោះអាត្មាស្រឡាញ់សង្គមចម្រើនពរ»។
បន្ទាប់ពីវិលត្រឡប់មកពីសិក្សានៅប្រទេសឥណ្ឌាព្រះតេជគុណបានចូលធ្វើការនៅអង្គការក្រៅរដ្ឋាភិបាលមួយ។ រហូតដល់ថ្ងៃទី ១២ ខែកញ្ញាឆ្នាំ ២០១១ ព្រះតេជគុណបានចូលធ្វើការជាសាស្ត្រាចារ្យនៅសាកលវិទ្យាល័យល្បីឈ្មោះមួយក្នុងរាជធានីភ្នំពេញដោយទទួលបានប្រាក់ខែសមរម្យ។
ព្រះតេជគុណមានព្រះនាមជាសាស្ត្រាចារ្យពូកែនិយាយមានទ្រឹស្តីល្អ។ ប៉ុន្តែនៅពេលនោះព្រះតេជគុណបានចោទសួរខ្លួនឯងថាបើគ្រាន់តែមានទ្រឹស្តីល្អពូកែនិយាយ អានសៀវភៅបានច្រើន ចាំឈ្មោះអ្នកនិពន្ធច្រើនតើវាមានប្រយោជន៍អ្វីដល់ជាតិ? ហើយតើត្រូវធ្វើអ្វីទៀត?«ពីព្រោះបង្រៀនមនុស្សបណ្តុះចំណេះដឹងការផ្តល់ចំណេះដឹងមិនទាន់ប្រាកដប្រជាថាផ្តល់មនសិការរឹងមាំក្នុងការជួយជាតិនោះទេ!»។
ព្រះតេជគុណបានធ្វើការនៅក្នុងសាកលវិទ្យាល័យដែលព្រះតេជគុណមិនចង់បញ្ចេញឈ្មោះនោះគឺគេឲ្យប្រាក់ខែច្រើនប៉ុន្តែគេហាមព្រះតេជគុណមិនឲ្យមានសង្ឃដីកាពីបញ្ហាសង្គមមិនឲ្យលើកពីបញ្ហានយោបាយឡើយ។
នៅទីបំផុតគឺនៅថ្ងៃទី ១ ខែកក្កដាឆ្នាំ ២០១៣ ព្រះតេជគុណក៏សម្រចចិត្តលាលែងពីការងារនៅសាកលវិទ្យាល័យនោះហើយទៅធ្វើជាអ្នកតស៊ូមតិនៅតាមសហគមន៍។ «ថ្ងៃហ្នឹងដែលអាត្មាក្តុកក្តួលមែនទែនគឺម៉ោង ៨ យប់នៅមុខវាំងពេលនុងគេចាប់យ៉ោម បុប្ជា (សកម្មជនដីធ្លីនៅបឹងកក់) យកទៅដាក់គុកទាំងយប់។ ជំនាន់ហ្នុងឃើញបញ្ហាអារំលោភយកដីហើយចាប់ម្ចាស់ដាក់គុកថែមហ្នុងណា។ ដល់ឃើញអ៊ីចឹងបានអាត្មាថាទេនៅមិនបានទេត្រូវតែចូលរួមចំណែកណាមួយតាមលទ្ធភាពរបស់យើង»។
នៅពេលនោះព្រះតេជគុណបានបង្ហោះវីដេអូឃ្លីបដែលនិយាយពីការចាប់ខ្លួនអ្នកស្រី យ៉ោម បុប្ជា ទាំងយប់តែម្តងហើយគ្រាន់តែវីដេអូឃ្លីបនោះចេញបង្ហោះភ្លាមគេថា «យើងយកបរិវេណសាលាគេធ្វើនយោបាយដោយសារអាត្មានៅក្នុងម៉ោងធ្វើការនៅឡើយហើយច្រឡំពាក់កាតស្ថាប័ន។ ដល់ច្រឡំពាក់កាតស្ថាប័នធ្វើវីដេអូឃ្លីបតាមហ្វេសប៊ុកគេឃើញគ្រាន់តែគេឃើញប៉ុណ្ណឹងមន្ត្រីគណបក្សប្រជាជនមួយចំនួនធំបានដាក់សម្ពាធទៅសាលាឲ្យបណ្តេញចេញបណ្តេញទាំងយប់ខុសម៉ោងរដ្ឋបាលទៀតចម្រើនពរបណ្តេញចំថ្ងៃអាទិត្យទៀតអាត្មាថាអត់អីទេមិនបាច់ដេញទេគង់តែទៅទេពីព្រោះអាត្មាចង់ធ្វើការងារសង្គមអ៊ីចឹងបានអាត្មាចេញមកធ្វើការនឹងចម្រើនពរ»។ ចាប់តាំងពីពេលនោះមកព្រះតេជគុណបានខិតខំធ្វើការងារដោយផ្តោតទៅលើការកសាងយុត្តិធម៌ និងកម្ចាត់អំពើពុករលួយ និងអំពើអយុត្តិធម៌នៅក្នុងសង្គម។
ព្រះតេជគុណ ប៊ុត ប៊ុនតិញ (ឆ្វេង) លោកបណ្ឌិត ឡៅ ម៉ុងហៃ និងលោកបណ្ឌិត កែម ឡី កាលពីពេលកន្លងមក។ រូបថត ហ្វេសប៊ុក
កន្លងមកគេឃើញព្រះតេជគុណ ប៊ុនតិញ និងព្រះសង្ឃជាច្រើនអង្គដែលជាសមាជិកនៃបណ្តាញព្រះសង្ឃឯករាជ្យតែងតែចូលរួមតវ៉ាជាមួយគណបក្សប្រឆាំង និងសកម្មជនដីធ្លី សកម្មជនបរិស្ថានដើម្បីប្រឆាំងទៅនឹងការរំលោភបំពានផ្សេងៗ និងប្រឆាំងទៅនឹងអំពើអយុត្តិធម៌នៅក្នុងសង្គមធ្វើឲ្យមន្ត្រីរដ្ឋាភិបាលមួយចំនួនបានចាត់ទុកថាក្រុមព្រះសង្ឃទាំងនេះជាសមាជិកគណបក្សប្រឆាំង។
ក៏ប៉ុន្តែព្រះតេជគុណ ប៊ុនតិញ បានបដិសេធការចោទប្រកាន់នេះដោយមានសង្ឃដីកាថាព្រះតេជគុណមិនត្រឹមតែមិនមានតួនាទីក្នុងគណបក្សប្រឆាំងប៉ុណ្ណោះទេថែមទាំងមិនដែលបានចុះឈ្មោះចូលជាសមាជិកគណបក្សនេះទៀតផង និងថែមទាំងមិនដែលទទួលបានផលប្រយោជន៍អ្វីពីគណបក្សប្រឆាំងសោះឡើយ។ ប៉ុន្តែការងាររបស់ព្រះតេជគុណផ្តោតទៅលើយុត្តិធម៌សង្គមហើយគណបក្សណាក៏ដោយដែលតវ៉ាប្រឆាំងទៅនឹងអំពើអយុត្តិធម៌សង្គមប្រឆាំងនឹងអំពើពុករលួយព្រះតេជគុណនឹងចូលរួមដោយមិនសំដៅតែទៅលើគណបក្សសង្គ្រោះជាតិនោះឡើយ។
«ប៉ុន្តែដោយសារមើលឃើញគណបក្សសង្គ្រោះជាតិគេតវ៉ារកយុត្តិធម៌ពេលនុងគឺភាពមិនប្រក្រតីនៃការបោះឆ្នោតហីអាត្មាជាម្ចាស់ឆ្នោតម្នាក់ដែរមានសិទ្ធិគ្រប់គ្រាន់ក្នុងការតវ៉ាអាហ្នឹងហើយដែលចូលរួមជាមួយគេហ្នឹងដោយសារតែយើងចង់បានថាអ្នកណាយកសន្លឹកឆ្នោតយើងហើយអាត្មាខ្លួនឯងផ្ទាល់អ្នកទៅស្រាវជ្រាវឈ្មោះខ្មោចនៅខេត្តសៀមរាបជិត ១០ ម៉ឺននាក់»។
ព្រះតេជគុណបានគូសបញ្ជាក់ទៀតថា៖ «អាស្រ័យហេតុដូច្នោះហើយបានឃើញវត្តមានពួកអាត្មារហូតហ្នឹងដោយសារអាត្មាជាម្ចាស់ឆ្នោតរឿងទី ១។ រឿង ទី ២ អាត្មាបានផលប្រយោជន៍ពីសង្គមអាត្មាពីព្រោះកាលណាសង្គមមួយមានយុត្តិធម៌សង្គមមួយមានសន្តិភាពសង្គមមួយដែលមានការគោរពសិទ្ធិមនុស្សពេញលេញគឺយើងទាំងអស់គ្នាបានផលប្រយោជន៍។ ហីបើអ្នកណាក៏ដោយគណបក្សណាក៏ដោយឲ្យតែធ្វើការផ្តល់ផលប្រយោជន៍ឲ្យមនុស្សប្រាកដណាស់អាត្មានឹងចូលរួម»។
បច្ចុប្បន្នព្រះតេជគុណ ប៊ុនតិញ មិនមានវត្តណាមួយគង់នៅស្នាក់អាស្រ័យពិតប្រាកដឡើយដោយសារតែគ្រប់វត្តទាំងអស់ពុំមានវត្តណាមួយហ៊ានចុះឈ្មោះឲ្យព្រះតេជគុណគង់នៅឡើយដោយសារតែមានសម្ពាធនយោបាយពីថ្នាក់លើ។
ព្រះតេជគុណតែងតែនិមន្តពីខេត្តមួយទៅខេត្តមួយដើម្បីបំពេញការងារដោយពេលខ្លះត្រូវចូលគង់នៅតាមវត្តមួយចំនួនក្នុងរយៈពេលខ្លី ឬក៏ត្រូវចងអង្រឹងសិងនៅតាមចិញ្ចើមផ្លូវក៏មាន។
«ហើយក្នុងឡានអាត្មាដាក់អង្រឹង ៤-១០ ស្រេចចម្រើនពរអត់មានប្រកាន់ទេយប់ត្រង់ណា ចងអង្រឹងត្រង់ហ្នឹងអ្នកណាចង់ទៅសិង ចង់ទៅសម្រាកជាមួយមានអង្រឹង។ ដូច្នេះពេញចិត្តទោះបីជាចងអង្រឹងសិងតាមចិញ្ចើមផ្លូវ ឬត្រូវសិងនៅទីណាក៏សិងដែរឲ្យតែបានឱកាសបម្រើសង្គមនេះជាឆន្ទៈធំ មិនមែនឆន្ទៈធំទាល់តែមានកុដិល្អមានវិហារមានអ្នកយកបាយទៅប្រគេនបានសប្បាយអត់ទេចម្រើនពរមិនពេញចិត្តនឹងអ៊ីចឹងទេ»។
ព្រះតេជគុណបានឧទ្ទិសថានឹងមិនធ្វើការដើម្បីបានសេចក្តីសុខតែម្នាក់ឯងទេបើចង់ជួយសង្គមខ្មែរទាល់តែមនុស្សហ៊ានលះបង់សេចក្តីសុខផ្ទាល់ខ្លួនទៅបម្រើសង្គមបានយើងបានជោគជ័យដល់សង្គម ប៉ុន្តែមិនមែនជោគជ័យបុគ្គលទេ។
ព្រះតេជគុណបន្តថាការលះបង់ផលប្រយោជន៍ផ្ទាល់ខ្លួនទៅបម្រើផលប្រយោជន៍សង្គមមិនអាចមនុស្សគ្រប់គ្នាធ្វើបានទេហើយព្រះតេជគុណគិតថាអ្នកណាអាចធ្វើបានធ្វើទៅមិនគួរទិតៀនអ្នកដែលមិនទាន់បានធ្វើរឿងនេះនោះទេពីព្រោះថ្ងៃណាមួយគេនឹងធ្វើដូចព្រះតេជគុណដែរពីព្រោះពីមុនព្រះតេជគុណមិនដែលលះបង់ផលប្រយោជន៍ផ្ទាល់ខ្លួនទៅធ្វើផលប្រយោជន៍សង្គមនោះទេប៉ុន្តែដល់ពេលដល់វេលាដែលត្រូវធ្វើព្រះតេជគុណធ្វើ។
បច្ចុប្បន្នស្ថានការណ៍នយោបាយនៅក្នុងប្រទេសកម្ពុជាកំពុងតែឡើងកម្តៅ។ ឡើងកម្តៅដោយសារតែមានការចាប់ឃុំខ្លួនជាបន្តបន្ទាប់ទៅលើអ្នកតំណាងរាស្ត្រ និងសកម្មជនគណបក្សប្រឆាំងមន្ត្រីអង្គការការពារសិទ្ធិមនុស្សអាដហុក និងអគ្គលេខាធិការរង គជប ហើយនឹងមានការប៉ុនប៉ងចាប់ឃុំខ្លួនលោក កឹម សុខា ប្រធានស្តីទីគណបក្សសង្គ្រោះជាតិ និងអ្នកតំណាងរាស្ត្រគណបក្សប្រឆាំងមួយចំនួនទៀតពាក់ព័ន្ធនឹងសំណុំរឿងដែលមជ្ឈដ្ឋានជាច្រើនគិតថាគឺជារឿងនយោបាយដែលត្រូវបានគេបង្កឡើងដើម្បីបម្រើតែផលប្រយោជន៍បុគ្គល និងផលប្រយោជន៍បក្ស។
នៅថ្ងៃទី ១០ ខែកក្កដានេះទៀតលោកបណ្ឌិត កែម ឡី ដែលជាអ្នកវិភាគឯករាជ្យត្រូវបានខ្មាន់កាំភ្លើងបាញ់សម្លាប់។
ព្រះតេជគុណ ប៊ុនតិញ ដែលតែងតែរួមសហការជិតស្និទ្ធជាមួយលោកបណ្ឌិត កែម ឡី ក្នុងការធ្វើកិច្ចការបម្រើសង្គមមើលឃើញថាការឡើងកម្តៅនយោបាយនាពេលបច្ចុប្បន្នគឺកើតឡើងដោយសារតែអ្នកនយោបាយខ្មែរមានអំនួតដាក់គ្នាទៅវិញទៅមក។
ព្រះតេជគុណបន្តថាប្រសិនបើព្រះតេជគុណត្រូវបានគេផ្តល់សិទ្ធិឲ្យធ្វើជាអ្នកសម្រេចចិត្ត ឬក៏ជាអ្នកបង្រួបបង្រួមដោះស្រាយវិបត្តិនយោបាយនេះជាដំបូងគឺព្រះតេជគុណត្រូវលួងលោមអ្នកនយោបាយខ្មែរទាំងអស់ឲ្យឈប់អួត។ «ឈប់អួត ឈប់ខ្លាំងដាក់គ្នាទៅចម្រើនពរ មិនគួរយើងអួតខ្លាំងតែម្នាក់យើងទេពីព្រោះទឹកដីខ្មែរប្រទេសខ្មែរជាទឹកដីរួមជារបស់រួមកុំយកទៅធ្វើជាកម្មសិទ្ធិ។ រាល់ថ្ងៃនេះអ្នកនយោបាយកាន់អំណាចយល់ថាកម្ពុជាជាទឹកដីរបស់គាត់ គាត់ថាគាត់រំដោះបានជាប្រទេសរបស់គាត់កាលដែលខ្មែរមានសង្គ្រាមអ្នកឯងនៅឯណាម៉េចមិនមកតស៊ូ! អ៊ីចឹងឆន្ទៈប្រភេទនេះគេហៅថាជាឆន្ទៈយកជាតិធ្វើជាកម្មសិទ្ធិ។ ហីដរាបណាយើងយកជាតិធ្វើជាកម្មសិទ្ធិដោះម៉េចចេញចម្រើនពរ!»។
ព្រះសង្ឃដែលអាចនិយាយសរសេរបាន ៥ ភាសាគឺភាសាអង់គ្លេស ថៃ ឥណ្ឌា ភូមា និងសំស្ក្រឹតអង្គនេះបន្តថាអ៊ីចឹងហើយចំណុចទី ១ គឺត្រូវធ្វើការសម្របសម្រួលគ្នាដើម្បីកុំឲ្យអ្នកនយោបាយគាត់ប្រកាន់មានះហើយអួតថាខ្លួនជាអ្នកខ្លាំងហើយសុំឲ្យអ្នកនយោបាយខ្មែរធ្វើខ្លួនជាអ្នកបម្រើជាតិវិញ។ ទី ២ យើងត្រូវគិតថាផលប្រយោជន៍ណាដែលវាបានទៅជាតិ និងប្រជាពលរដ្ឋហើយត្រូវតម្កល់ផលប្រយោជន៍ទាំងនោះយកទៅចរចាគ្នា។
បទពិសោធដែលកម្ពុជាបានឆ្លងកាត់ពីទសវត្សន៍ ៧០ មកដល់ ៩០ កម្ពុជាបានប្រើចុងកាណុងច្បាំងគ្នាដោយអួតថាខ្លួនពូកែច្បាំងប៉ុន្តែលទ្ធផលចុងក្រោយគឺខ្មែរជួបនូវសោកនាដកម្មខ្មែរមួយចំហៀងប្រទេសបានរត់ទៅជ្រកកោននៅប្រទេសទី ៣។
ព្រះតេជគុណបានបញ្ជាក់ថា៖ «រហូតមកដល់ពេលនេះអ្នកនយោបាយមិនគួរធ្វើនយោបាយបង្កបញ្ហាធ្វើឲ្យខ្មែរវេចសម្ពាយរត់ទៅជ្រកកោននៅប្រទេសគេទៀតទេគួរតែយើងធ្វើយ៉ាងណាឲ្យខ្មែររស់នៅលើទឹកដីរបស់ខ្លួនហើយមានសិទិ្ធគ្រប់គ្រាន់ដើម្បីការពារបូរណភាពទឹកដីរបស់ខ្លួន»។
មែនទែនទៅអ្នកនយោបាយគឺគ្រាន់តែជាអ្នកឈានមុខប៉ុណ្ណោះចំណែកឯអ្នកការពារទឹកដីពិតប្រាកដគឺជនរួមជាតិខ្មែរមួយនគរ។
ព្រះតេជគុណបន្តថាក្នុងស្ថានភាពបច្ចុប្បន្ននេះអ្នកនយោបាយត្រូវតែយកបញ្ហាជាតិជាចម្បងហើយដាក់នៅលើតុដើម្បីចរចាគ្នាដោយមិនត្រូវចាត់ទុកខ្មែរណាជាសត្រូវជាឆ្អឹងទទឹងករបស់ខ្លួនឡើយប៉ុន្តែត្រូវចាត់ទុកខ្មែរទាំងអស់ជាចលករសង្គមការពារប្រទេសជាតិ។
មួយវិញទៀតព្រះតេជគុណចង់ឲ្យអ្នកនយោបាយចេះធ្វើនយោបាយតាមបែបវប្បធម៌ថ្មីគឺបើទោះបីជាពួកគេមកពីគណបក្សណាក៏ដោយពួកគេត្រូវតែចេះជជែកគ្នាពីបញ្ហារបស់ជាតិខណៈដែលតាំងពីព្រះតេជគុណដឹងក្តីមកអ្នកនយោបាយខ្មែរមិនសូវជាយកបញ្ហាជាតិមកនិយាយទេភាគច្រើនគឺនិយាយតែពីគណបក្សរៀងៗខ្លួន។
«រាល់ថ្ងៃយើងផ្អែកតែលើបក្សអញអ៊ីចេះបក្សឯងហ្នឹងវាអ៊ីចុះបើកាលណានៅតែបក្សអញ បក្សឯងមិនគិតថាបញ្ហារបស់ជាតិខ្ញុំវាអ៊ីចឹងគណបក្សខ្ញុំអាចរួមចំណែកដោះស្រាយបានជ្រុងនេះគណបក្សរបស់អ្នកអាចដោះស្រាយបានជ្រុងនេះ...អ៊ីចឹងបើយើងទាំងអស់គ្នាជាអ្នកមានឆន្ទៈដោះស្រាយបញ្ហារបស់ជាតិ ចូលជាមួយគ្នាម៉ោ! ខុសគ្នាតែគណបក្សនយោបាយប៉ុន្តែបញ្ហាគឺតែ ១ បញ្ហាជាតិរួមគ្នារួមគ្នាដោះស្រាយទៅ»។
បច្ចុប្បន្នព្រះតេជគុណមិនដែលឃើញអ្នកនយោបាយយកបញ្ហារួមរបស់ជាតិទៅចរចាទេគឺគិតតែពីផលប្រយោជន៍របស់បក្ស និងបុគ្គលដោយធ្វើនយោបាយរហូតដល់ទាល់ច្រកហើយមិនដឹងធ្វើយ៉ាងម៉េចទៅវ៉ៃបុគ្គល។ «អាត្មាមិនដែលឃើញប្រទេសណាគេធ្វើនយោបាយយកបញ្ហាបុគ្គលទៅវ៉ៃដើម្បីជ័យជម្នះ! ស្រុកយើងហ្នឹងគេយកបញ្ហាបុគ្គលមកវ៉ៃដើម្បីជ័យជម្នះនយោបាយរបស់ខ្លួនធ្វើម៉េចទៅរួចចម្រើនពរ! វាមិនដែលណាគេទៅឈ្លោះគ្នារឿងបុគ្គលចាប់គេដាក់គុកគិតថាបញ្ហាជាតិអត់អាចទេ...ហើយគណបក្សកាន់អំណាចបានមើលឃើញថាខ្លួនអស់ឱកាសទាញប្រជាប្រិយភាពពីម្ចាស់ឆ្នោតហើយដូច្នេះមានតែចាប់អ្នកប្រឆាំងដាក់គុកឲ្យផុតដើម្បីឲ្យប្រជាពលរដ្ឋអត់មានផ្លូវដើរមានតែបោះឆ្នោតឲ្យបក្សកាន់អំណាច។ ប៉ុន្តែគាត់ថាគាត់ធ្វើហ្នឹងជោគជ័យ! អត់ជោគជ័យទេគាត់គិតខុសធ្វើខុសនិយាយខុស»។
ព្រះតេជគុណបន្តថាសម្រាប់គណបក្សនយោបាយដែលចង់ជោគជ័យនៅលើទឹកដីមួយដែលមានព្រះពុទ្ធសាសនាជាគោលគឺត្រូវគិតត្រូវ និយាយត្រូវ ធ្វើត្រូវ។
បច្ចុប្បន្នគណបក្សកាន់អំណាច គិតថាទី ១ កាលណាចាប់មេបក្សប្រឆាំងដាក់គុកអស់ទៅប្រជាពលរដ្ឋអស់ផ្លូវដើរប្រាកដជាបោះឆ្នោតឲ្យខ្លួនហើយទី ២ បក្សកាន់អំណាចគាត់គិតថាបំបែកគណបក្សប្រឆាំងឲ្យបានគណបក្សប្រជាជនអាចនៅកាន់អំណាចបន្ត។ ទី ៣ ទៀតគណបក្សប្រជាជនធ្វើយ៉ាងណាឲ្យប្រជាពលរដ្ឋភ័យខ្លាចកុំឲ្យចូលរួមក្នុងចលនានយោបាយគាត់ឈ្នះដដែល។
បើតាមគំនិតរបស់ព្រះតេជគុណក្នុងស្ថានភាពនយោបាយបច្ចុប្បន្នគណបក្សកាន់អំណាចត្រូវតែបន្ទន់ឥរិយាបថបន្តិចទៅហើយអន្ទងគណបក្សប្រឆាំងឲ្យចូលទៅចរចាគ្នាទៅអ្វីៗនឹងអាចដោះស្រាយបានហើយស្ថានការណ៍នយោបាយនឹងវិលមករកភាពប្រក្រតីវិញដោយព្រះតេជគុណបានគូសបញ្ជាក់ថាវាមិនមានអ្វីដែលត្រូវប្រឆាំងទៀតទេពីព្រោះគណបក្សប្រឆាំងធ្វើនយោបាយចង់ឲ្យមានឱកាសចូលរួមដោះស្រាយបញ្ហាជាតិចង់បានឱកាសធ្វើការបម្រើជាតិ។
ព្រះតេជគុណលើកឡើងថា៖ «ហីចុះបើគណបក្សប្រជាជនគិតថាខ្លួនឯងមានឱកាសយូរឆ្នាំហើយ ៣៦ ឆ្នាំហើយផ្តល់ឱកាសដល់បក្សប្រឆាំងឲ្យគេចូលរួមធ្វើផងទៅកុំឲ្យខ្លាំងតែម្នាក់ឯង។ អ៊ីចឹងបានសរុបសេចក្តីទៅវិញថាឈប់អួតថាឯងខ្លាំងទៅ»។
កាលពីដំបូងព្រះតេជគុណ ប៊ុត ប៊ុនតិញ បានតាំងចិត្តបួសជាសង្ឃត្រឹមតែរយៈពេល ៣ ខែប៉ុណ្ណោះប៉ុន្តែរហូតមកដល់ពេលនេះព្រះតេជគុណបានគ្រងភាពជាសង្ឃមានរយៈពេល ១៦ ព្រះវស្សាមកហើយប៉ុន្តែនៅតែមិនទាន់ដាច់ចិត្តសឹកបើទោះជាបានប៉ុនប៉ងសឹកហើយទិញខោអាវ ៤-៥ លើកមកហើយក៏ដោយដោយសារនៅជាសង្ឃមានឱកាសច្រើនក្នុងការជួយសង្គម។
បន្ទាប់ពីឈប់ធ្វើការនៅសាកលវិទ្យាល័យព្រះតេជគុណបានចូលរួមធ្វើកិច្ចការជួយសង្គមដោយផ្តោតជាពិសេសទៅលើការជួយអភិរក្សធនធានធម្មជាតិដែលពីដំបូងព្រះតេជគុណបានប្រើប្រាស់ថវិកាផ្ទាល់ខ្លួន។ ពេលអស់ថវិកាផ្ទាល់ខ្លួនទើបមានពុទ្ធបរិស័ទទាំងក្នុង និងក្រៅប្រទេសប្រគេនបច្ច័យសម្រាប់ធ្វើការរហូតគឺព្រះតេជគុណត្រូវការពេលណាគឺបានពេលហ្នឹង។ ក្រៅពីនេះក៏មានអង្គការអាមេរិកមួយជួយផងដែរប៉ុន្តែគម្រោងថវិកានោះត្រូវបានបញ្ចប់ហើយ ហើយនៅពេលនេះព្រះតេជគុណកំពុងរៀបចំដាក់សំណើទៅអង្គការផ្សេងទៀតដើម្បីយកមកបន្តធ្វើសកម្មភាពក្នុងការការពារធនធានធម្មជាតិដែលកំពុងទទួលរងការបំផ្លាញ។
នៅពេលខាងមុខប្រសិនបើដាច់ចិត្តសឹកព្រះតេជគុណនឹងធ្វើជាអ្នកជំនួញហើយប្រសិនបើធ្វើជំនួញបានជោគជ័យព្រះតេជគុណនឹងធ្វើជាអ្នកនយោបាយខណៈអ្នកនយោបាយភាគច្រើននៅក្នុងសង្គមខ្មែរបច្ចុប្បន្នធ្វើនយោបាយដើម្បីបានតំណែងតួនាទីធំនៅក្នុងរដ្ឋាភិបាលដើម្បីប្រព្រឹត្តអំពើពុករលួយ។ «អ៊ីចឹងអាត្មាមិនចង់ទៅធ្វើការងារនយោបាយដោយសម្លឹងយកអំណាចនយោបាយដើម្បីបើកចំហហោប៉ៅសេដ្ឋកិច្ចទេអាត្មាត្រូវតែផ្លាស់ប្តូរឥរិយាបថនៃការធ្វើនយោបាយគឺបើកហោប៉ៅសេដ្ឋកិច្ចឲ្យធំយើងមានសេដ្ឋកិច្ចពេញហោប៉ៅទៅធ្វើនយោបាយដើម្បីសេចក្តីថ្លៃថ្នូរ»។
ប៉ុន្តែទោះបីយ៉ាងណារហូតមកដល់ពេលនេះព្រះតេជគុណនៅមិនទាន់សម្រេចចិត្តថាតើនៅក្នុងពេលអនាគតនឹងទៅចូលរួមជាមួយគណបក្សណាមួយ ឬក៏ត្រូវបង្កើតគណបក្សមួយដោយខ្លួនឯងនៅឡើយទេបើទោះបីជាមានអ្នកបបួលព្រះតេជគុណឲ្យបង្កើតគណបក្សហើយគេជាអ្នករ៉ាប់រងថវិកាទាំងអស់ដែលព្រះតេជគុណគិតថាជាអន្ទាក់ក៏ដោយ។
នៅពេលសុំការបញ្ជាក់បន្ថែមកាលពីម្សិលមិញថាតើព្រះតេជគុណខ្លាចអត់ខណៈដែលលោក កែម ឡី ត្រូវបានបាញ់សម្លាប់?
ព្រះតេជគុណឆ្លើយថា៖ «អាត្មាខ្លាចប៉ុន្តែអ្វីដែលអាត្មាបាននិងកំពុងធ្វើវាជាតួនាទីជាកាតព្វកិច្ចដែលត្រូវបំពេញដើម្បីបុព្វហេតុសេរីភាព និងយុត្តិធម៌សង្គមធ្វើយ៉ាងណាឲ្យពលរដ្ឋខ្មែរទាំងអស់បានរស់នៅក្នុងសេចក្តីថ្លៃថ្នូរហីបើគ្រាន់តែធ្វើកិច្ចការងារជួយសង្គមអ៊ីចឹងត្រូវគេសម្លាប់ក៏តាមដំណើរទៅចម្រើនពរព្រោះតែខ្លាចឲ្យអាត្មាឈប់អាត្មាអត់ឈប់ទេចម្រើនពរគឺត្រូវតែបន្តធ្វើឲ្យកាន់តែខ្លាំងជាងមុនថែមទៀត»៕
រាយការណ៍បន្ថែមដោយក្រុមថតវីដេអូ
3 comments:
Please be safe....we have a long way to go...
«អាត្មាមិនដែលឃើញប្រទេសណាគេធ្វើនយោបាយយកបញ្ហាបុគ្គលទៅវ៉ៃដើម្បីជ័យជម្នះ! ស្រុកយើងហ្នឹងគេយកបញ្ហាបុគ្គលមកវ៉ៃដើម្បីជ័យជម្នះនយោបាយរបស់ខ្លួនធ្វើម៉េចទៅរួចចម្រើនពរ! វាមិនដែលណាគេទៅឈ្លោះគ្នារឿងបុគ្គលចាប់គេដាក់គុកគិតថាបញ្ហាជាតិអត់អាចទេ...ហើយគណបក្សកាន់អំណាចបានមើលឃើញថាខ្លួនអស់ឱកាសទាញប្រជាប្រិយភាពពីម្ចាស់ឆ្នោតហើយដូច្នេះមានតែចាប់អ្នកប្រឆាំងដាក់គុកឲ្យផុតដើម្បីឲ្យប្រជាពលរដ្ឋអត់មានផ្លូវដើរមានតែបោះឆ្នោតឲ្យបក្សកាន់អំណាច។ ប៉ុន្តែគាត់ថាគាត់ធ្វើហ្នឹងជោគជ័យ! អត់ជោគជ័យទេគាត់គិតខុសធ្វើខុសនិយាយខុស»។
ព្រះតេជគុណ ប៊ុត ប៊ុនតិញ :
គេយកស្រុកខ្មែរធ្វើជាល្បែងអុក ដែលគេបង្កើតកលល្បិចគ្រប់យ៉ាង ដើម្បីយកឈ្នះគូប្រជែង ស្លាប់អ្នកណាស្លាប់ទៅអោយតែអញឈ្នះ។
09:05
Our struggle to rescue our Motherland is NOT Khmers against Khmers, but rather the
Khmer people against some groups of Yuon sold-out " Khmers ".
Post a Comment