តុលាការ​នឹងបន្ត​សាកសួរ​ជនសង្ស័យសម្លាប់លោក កែម ឡី នៅថ្ងៃ​ស្អែកទៀត

តុលាការ​នឹងបន្ត​សាកសួរ​ជនសង្ស័យសម្លាប់លោក កែម ឡី នៅថ្ងៃ​ស្អែកទៀត
ដោយ លោក ស៊ុន ណារិន​​ | ថ្ងៃអង្គារ ទី១២ ខែកក្កដា ឆ្នាំ២០១៦​ 


លោក អឿត អាង ដែលសមត្ថកិច្ចចាប់បាននិងថាជាខ្មាន់កំាភ្លើងបាញ់សម្លាប់លោក កែម ឡី​
ព្រះរាជអាជ្ញាសាលាដំបូងរាជធានីភ្នំពេញបានឲ្យដឹងថាតុលាការនឹងបន្តសាកសួរបុរសម្នាក់ដែលត្រូវសមត្ថកិច្ចចាប់ខ្លួននិងថាជាខ្មាន់កាំភ្លើងបាញ់សម្លាប់ លោក កែម ឡី នៅថ្ងៃស្អែកបន្តទៀត។

អ្នកវិភាគបញ្ហាសង្គម លោកបណ្ឌិត កែម ឡី ត្រូវបានខ្មាន់កំាភ្លើងបាញ់សម្លាប់នៅម៉ោងប្រមាណ៩ព្រឹក កាលពីថ្ងៃអាទិត្យ នៅម៉ាតលក់ទំនិញមួយក្បែរស្តុបបូកគោ។ ក្រោយពីការបាញ់សម្លាប់ភ្លាមៗ ខ្មាន់កាំភ្លើងម្នាក់ ឈ្មោះ អឿត អាង ត្រូវបានសមត្ថកិច្ចតាមចាប់និងចាប់ខ្លួនបាន។

អ្នកនាំពាក្យអយ្យការអមសាលាដំបូងនិងជាព្រះរាជអាជ្ញារងដែលកាន់សំណុំរឿងនេះ លោក លី សុផាណា ប្រាប់អ្នកសារព័ត៌មានតាមប្រព័ន្ធតេលេក្រាម(Telegram)នៅល្ងាចថ្ងៃអង្គារនេះថាអយ្យការបានសម្រេចរក្សាទុកជនល្មើសនៅស្នងការដ្ឋាននគរបាលរាជធានីភ្នំពេញ ដើម្បីបន្តនីតិវិធីនៅថ្ងៃស្អែក បន្ទាប់ពីការសួរចម្លើយពេញមួយថ្ងៃ។ លោកបន្ថែមថា៖ “យើងកំពុងពិនិត្យលើឯកសារសំណុំរឿងដែលបានស្រាវជ្រាវនិងបញ្ជូនមកពីស្នងការដ្ឋានរាជធានីភ្នំពេញរួមជាមួួយនឹងចម្លើយជនល្មើស សាក្សីនិងភស្តុតាងផ្សេងៗទៀតដែលចាប់យកពីកន្លែងកើតហេតុ”។

លោក លី សុផាណា បញ្ជាក់បន្ថែមថា៖ “ការសួរចម្លើយនេះបានផ្តល់ប្រយោជន៍និងតម្រុយជាច្រើនសម្រាប់ការស៊ើបអង្កេតនិងការចោទប្រកាន់នៅក្នុងរឿងក្តីនេះ។ យើងកំពុងពិនិត្យលើឯកសារចម្លើយ ឯកសារនានានិងភស្តុតាងផ្សេងទៀតនៅក្នុងរឿងនេះដែលឈានទៅដល់ការសម្រេចចោទប្រកាន់នៅថ្ងៃស្អែក”។



លោក លី សុផាណា ឲ្យដឹងទៀតថាការសាកសួរនេះ ជនសង្ស័យមិនមានមេធាវីនោះទេ។ លោកមានប្រសាសន៍ថា៖ “ពេលវេលានេះជាការពិនិត្យ ស្រាវជ្រាវនិងស៊ើបអង្កេតដែលត្រូវធានានូវការសម្ងាត់នៃការស៊ើបអង្កេត។ ជនល្មើសឆ្លើយដោយខ្លួនឯងដោយមិនមានមេធាវីនិងមិនទាន់បានពឹងពាក់មេធាវីការពារសិទ្ធិឲ្យខ្លួននៅឡើយទេមកដល់ពេលនេះ”។

កាលពីថ្ងៃអាទិត្យ ស្នងការនគរបាលរាជធានីភ្នំពេញ លោក ជួន សុវណ្ណ បានអះអាងក្នុងសន្និសីទសារព័ត៌មានមួយថាបុរសដែលត្រូវចាប់ខ្លួននោះបាននិយាយថាខ្លួនមានឈ្មោះ ជួប សម្លាប់ អាយុ៣៨ឆ្នាំនិងមានស្រុកកំណើតនៅឯស្រុកស្វាយចេក ខេត្តបន្ទាយមានជ័យ។ ទោះជាយ៉ាងណា សមត្ថកិច្ចពុំបានបញ្ជាក់ពីមូលហេតុនៃបាញ់ប្រហារលើលោកបណ្ឌិត កែម ឡី នៅឡើយទេ ដោយគ្រាន់តែប្រាប់ថាជនដៃដល់ធ្លាប់ទៅរស់នៅនិងធ្វើជាកម្មករនៅចម្ការដំណាំនៅខេត្តស្រះកែវ ប្រទេសថៃ។ សមត្ថកិច្ចថាខ្លួនមិនជឿចម្លើយសារភាពរបស់ជនសង្ស័យនោះទេនិងថានឹងបន្តស៊ើបអង្កេតលើករណីនេះ។

ប្រពន្ធរបស់លោក អឿត អាង គឺអ្នកស្រី ហឿម ហ៊ត់ អាយុ៤៥ឆ្នាំ បានប្រាប់អ្នកយកព័ត៌មានវីអូឌីកាលពីថ្ងៃចន្ទ ពេលចុះទៅជួបផ្ទាល់ថាប្តីរបស់អ្នកស្រីមានឈ្មោះថា អឿត អាង ហើយអ្នកស្រីមិនដែលឭឈ្មោះជួប សម្លាប់ នោះទេ។ អ្នកស្រីបន្តថាប្តីបានមករាជធានីភ្នំពេញជាង១០ថ្ងៃមកហើយមកដល់ពេលនេះ តែអ្នកស្រីថាមិនបានដឹងពីមូលហេតុដែលប្តីមកភ្នំពេញនោះទេ។

បើតាមអ្នកស្រី ហឿម ហ៊ត់ អ្នកស្រីទើបតែរៀបចំពិធីសែនការជាមួយលោក អឿត អាង បានប្រហែល២ខែប៉ុណ្ណោះ គឺកាលពីថ្ងៃទី៧ ខែឧសភា ឆ្នាំ២០១៦។ អ្នកស្រីឲ្យដឹងទៀតថាពីដំបូងឡើយ ប្តីរបស់អ្នកស្រីបានបួសជាព្រះសង្ឃនៅវត្ដក្រឡាញ់ ក្នុងស្រុកក្រឡាញ់ផងនិងធ្លាប់ធ្វើជាចៅអធិការនៅវត្ដពើងតានន្ទ ស្រុកអង្គរជុំខេត្ដសៀមរាបផងដែរ។ អ្នកស្រីបានបញ្ជាក់ទៀតថាប្តីធ្វើការផ្នែកបរិស្ថានគឺជានាយករងប្រតិបត្ដិ តែអ្នកស្រីមិនដឹងពីព័ត៌មានលម្អិតនោះទេ។

ទោះជាយ៉ាងណា មន្ទីរបរិស្ថានខេត្ដសៀមរាបបានបញ្ជាក់ថាមិនមានឈ្មោះ អឿត អាង ជាមន្ដ្រីស្ថាប័ននោះទេ ដោយលោកថាអាចជាមន្ដ្រីអង្គការបរិស្ថានណាមួយដែលធ្វើការលើផ្នែកនេះ។

ពាក់ព័ន្ធនឹងការចោទប្រកាន់ថាប្តីសម្លាប់លោក កែម ឡី អ្នកស្រីបន្ថែមថា៖ “ទេ ធម្មតាលោកគ្រូ គាត់ធ្វើអំពើអាក្រក់ ក៏ស្រេចតែគាត់ទៅ ខ្ញុំក៏មិនដឹងដែរ ខ្ញុំប្រពន្ធ ខ្ញុំមិនបានប្រើគាត់ឲ្យទៅចុះទេ បើដឹងគាត់ទៅអញ្ចុះ ប្រពន្ធដែលឲ្យទៅទេ ប៉ុន្មានលានដុល្លារ ក៏ខ្ញុំមិនឲ្យទៅដែរ សុខចិត្តក្រខ្សត់ អត់ឃ្លាន ក៏នៅហូបអំបិលហូបប្រហុក ជុំប្តីជុំប្រពន្ធតើ មិនឲ្យសម្លាប់គេទេ បើយើងសម្លាប់គេហើយ មានទោសហើយ”។

ទោះជាយ៉ាងណា អ្នកស្រីក៏ឲ្យដឹងទៀតថាប្តីធ្លាប់បានលេងល្បែង ហើយបានយកលុយលក់ម៉ូតូបានយកទៅលេងល្បែង។ ទោះជាយ៉ាងណា អ្នកស្រីបញ្ជាក់ថាមិនបានស្តីបន្ទោសប្តីនោះទេ។

ម្តាយរបស់លោក អឿត អាង អ្នកស្រី ឯក តាំ អាយុ៦៤ឆ្នាំ រស់នៅក្នុងភូមិទន្លេស ឃុំនគរភាស ស្រុកអង្គរជុំ ខេត្តសៀមរាប។ អ្នកស្រីប្រាប់អ្នកយកព័ត៌មានវីអូឌីពេលចុះទៅដល់កន្លែងអ្នកស្រីរស់នៅថាអ្នកស្រីឃើញកូនប្រុសតាមទូរទស្សន៍និងឃើញប្រឡាក់ឈាម តែអ្នកស្រីឆ្ងល់ថាមិនដឹងមានរឿងអ្វីកើតឡើងចំពោះកូនប្រុស។ អ្នកស្រីបន្តថាកូនប្រុសបួស៤ឆ្នាំ ហើយមុននោះទៅរកស៊ីនៅប្រទេសថៃជាមួយអ្នកជិតខាង។ អ្នកស្រីបន្តថាធ្លាប់ឭកូននិយាយកាលពីនៅបួសថាមានគេជំពាក់លុយ៣ពាន់ដុល្លារ។ អ្នកស្រីមិនបានបញ្ជាក់ថាស្គាល់ឈ្មោះកែម ឡី នោះទេ តែថាកូនតែងនិយាយថាទារលុយគេមិនបានចំនួន៣ពាន់ដុល្លារ។

ទោះជាយ៉ាងណា អ្នកស្រីថាអ្នកស្រីមិននឹកស្មានថាកូនប្រព្រឹត្តអំពើឃាតកម្មបែបនេះនោះទេ។ អ្នកស្រីបញ្ជាក់ថា៖ “បើខ្ញុំដឹង ខ្ញុំមិនឲ្យកូនកាន់អំពើអាក្រក់ចុះទេ ព្រោះជីវិតគេដូចតែជីវិតយើង។ ខ្ញុំណា បើសិនតែខ្ញូំដឹង នៅស្រុកនេះ ខ្ញុំចាប់ទាញដៃ មិនឲ្យកូនធ្វើចុះទេ ព្រោះជីវិតគេមួយ គេស្តាយប៉ុន្មាន ហើយយើងមួយក៏ស្តាយប៉ុន្មាន ដល់អញ្ចឹងខ្ញុំខ្លោចចិត្តអស់ ខ្លោចចិត្ត ខ្ញុំមិនដឹងរឿងរ៉ាវអីសោះ”។

ទាក់ទងនឹងឈ្មោះ ជួប សម្លាប់ អ្នកស្រីបានរៀបរាប់ឈ្មោះនេះត្រូវបានដាក់ឲ្យពេលលោកធ្វើជាទាហាន។

ភរិយារបស់លោក កែម ឡី អ្នកស្រី ប៊ូ រចនា បានប្រាប់វីអូឌីកាលពីថ្ងៃអាទិត្យថាប្តីរបស់អ្នកស្រីមិនដែលមានបញ្ហាជាមួយអ្នកណានោះទេ។ អ្នកស្រីបានច្រានចោលការលើកឡើងថាលោក កែម ឡី ជំពាក់លុយគេមិនសង។ អ្នកស្រីចាត់ទុកករណីនេះជារឿងនយោបាយ។

ក្នុងពិធីសម្ពោធដាក់ឲ្យប្រើប្រាស់អគារនិងប្រព័ន្ធហេដ្ឋារចនាសម្ព័ន្ធមួយចំនួនទៀតនៅទីបញ្ជាការដ្ឋានកងរាជអាវុធហត្ថលើផ្ទៃប្រទេសកាលពីថ្ងៃចន្ទ លោកនាយករដ្ឋមន្រ្តី ហ៊ុន សែន អំពាវនាវកុំឲ្យមានការលាបពណ៌ថាករណីនេះជារឿងនយោបាយ។ លោកបន្ថែមថារដ្ឋាភិបាលរងការរិះគន់ថាអសមត្ថភាពក្នុងការការពារសន្តិសុខសុវត្ថិភាពជូនប្រជាពលរដ្ឋនិងការលាបពណ៌ករណីឃាតកម្មនេះជារឿងនយោបាយ។ លោកមានប្រសាសន៍ថា៖ “អ្វីទៅដែលហៅថាជាការខាតបង់? នេះជាការប៉ះពាល់ធ្ងន់ធ្ងរចំពោះមុខមាត់របស់រាជរដ្ឋាភិបាលតែម្តង? តើអ្នកណានឹងទទួលផលចំណេញអំពីរឿងបែបនេះកើតឡើង នៅក្នុងពេលដែលរាជរដ្ឋាភិបាលកំពុងនិយាយអំពីសន្តិសុខនិងសុវត្ថិភាពប្រជាពលរដ្ឋ។ ចំណុចនេះ ខ្ញុំគិតថាវាហាក់ដូចជាការផ្ចាញ់ផ្ចាលមួយសម្រាប់យើង”។

លោកនាយករដ្ឋមន្រ្តីបន្តទៀតថានៅកម្ពុជាងាយណាស់ក្នុងការប្រែក្លាយរឿងឃាតកម្មជារឿងនយោបាយ។ ទោះជាយ៉ាងណា លោកសង្ឃឹមថាប្រជាពលរដ្ឋនឹងមិនប្រែក្លាយឧក្រិដ្ឋកម្មនេះជារឿងនយោបាយនោះទេ៕ដោយ ស៊ុន ណារិន និងទូច សុខា