រដ្ឋសភាប្រគល់សំណើសុំលើកអភ័យឯកសិទ្ធិតំណាងរាស្ត្របក្សប្រឆាំងពីររូបទៅគណៈកម្មការទី៦
ដោយ យ៉ង ចាន់តារា
2016-07-18
អ្នកនាំពាក្យរដ្ឋសភា លោក ឡេង ប៉េងឡុង (កណ្ដាល) និងគណៈកម្មាធិការអចិន្ត្រៃយ៍រដ្ឋសភាមកពីគណបក្សសង្គ្រោះជាតិ លោក យ៉ែម បុញ្ញឫទ្ធិ (ស្ដាំ) ថ្លែងក្នុងសន្និសីទសារព័ត៌មានក្រោយកិច្ចប្រជុំ នៅថ្ងៃទី១៨ ខែកក្កដា ឆ្នាំ២០១៦។ RFA/Yang Chandara
RFA/Yang Chandara
រដ្ឋសភាបើកកិច្ចប្រជុំគណៈកម្មាធិការអចិន្ត្រៃយ៍នៅព្រឹកថ្ងៃទី១៨ ខែកក្កដា ដើម្បីពិភាក្សា និងអនុម័តលើរបៀបវារៈមួយចំនួនទាក់ទងនឹងការដកអភ័យឯកសិទ្ធិអ្នកតំណាងរាស្ត្រ សុពលភាពសមាជិកសភារបស់លោក សម រង្ស៊ី និងសេចក្តីព្រាងច្បាប់ចំនួន៥ ទាក់ទងនឹងវិស័យសុខាភិបាល និងកិច្ចការអាស៊ាន។
ក្នុងចំណោមរបៀបវារៈទាំង៨ នៃកិច្ចប្រជុំគណៈកម្មាធិការអចិន្ត្រៃយ៍រដ្ឋសភា មានរបៀបវារៈ៣ ដែលសំខាន់ជាងគេ។ របៀបវារៈទី១ ការពិនិត្យសំណើសុំដកអភ័យឯកសិទ្ធិតំណាងរាស្ត្របក្សប្រឆាំង ២រូប គឺលោក តុ វ៉ាន់ចាន់ និងលោក ពិន រតនា របស់អយ្យការអមសាលាដំបូងរាជធានីភ្នំពេញ។
របៀបវារៈទី២ គឺការពិនិត្យសំណើសុំរដ្ឋសភាបកស្រាយបំភ្លឺអំពីសុពលភាពសមាជិកសភារបស់លោក សម រង្ស៊ី ដែលត្រូវបានរដ្ឋសភាទទួលស្គាល់កាលពីឆ្នាំ២០១៤ ប៉ុន្តែដកសុពលភាពវិញនៅចុងឆ្នាំ២០១៥។ របៀបវារៈទី៣ គឺការពិនិត្យលើសំណើរបស់តំណាងរាស្ត្រគណបក្សសង្គ្រោះជាតិ សុំឲ្យរដ្ឋសភា បកស្រាយអំពីនីតិវិធី ឬមាត្រាដែលអនុញ្ញាតឲ្យតុលាការបន្តនីតិវិធីចំពោះតំណាងរាស្ត្រដែលមានអភ័យឯកសិទ្ធិ។
អ្នកនាំពាក្យរដ្ឋសភា លោក ឡេង ប៉េងឡុង ថ្លែងក្នុងសន្និសីទសារព័ត៌មានក្រោយកិច្ចប្រជុំថា ចំពោះរបៀបវារៈទី១ រដ្ឋសភាសម្រេចប្រគល់ករណីសំណើសុំលើកអភ័យឯកសិទ្ធិតំណាងរាស្ត្របក្សប្រឆាំង លោក តុ វ៉ាន់ចាន់ និងលោក ពិន រតនា របស់អយ្យការអមសាលាដំបូងរាជធានីភ្នំពេញ ជូនទៅគណៈកម្មការនីតិកម្ម និងយុត្តិធម៌ ធ្វើការសិក្សាស្រាវជ្រាវ និងធ្វើរបាយការណ៍ជូនគណៈកម្មាធិការអចិន្ត្រៃយ៍រដ្ឋសភាវិញ៖ «ចំពោះរបៀបវារៈនេះ គណៈកម្មាធិការអចិន្ត្រៃយ៍មិនទាន់សម្រេចយ៉ាងណាទេ គ្រាន់តែបញ្ជាឲ្យអគ្គលេខាធិការសរសេរលិខិតជម្រាបជូនទៅក្រសួងយុត្តិធម៌ ថាឥឡូវនេះរដ្ឋសភាស្ថិតនៅក្នុងវិស្សមកាល។ ដូច្នេះមិនអាចប្រជុំបានទេ»។
កាលពីថ្ងៃទី៣០ មិថុនា កន្លងទៅ រដ្ឋមន្ត្រីក្រសួងយុត្តិធម៌ លោក អង្គ វង្ស វឌ្ឍានា បានផ្ញើលិខិតទៅប្រធានរដ្ឋសភា ស្នើសុំដកអភ័យឯកសិទ្ធិសភាតំណាងរាស្ត្រ លោក តុ វ៉ាន់ចាន់ និងលោក ពិន រតនា។ សំណើនោះជាការឆ្លើយតបចំពោះលិខិតរបស់អយ្យការអមសាលាដំបូងរាជធានីភ្នំពេញ ដែលថា អ្នកតំណាងរាស្ត្រទាំង ២រូប កំពុងជាប់សង្ស័យក្នុងបទល្មើសព្រហ្មទណ្ឌ តាមមាត្រា២៨៤ នៃក្រមព្រហ្មទណ្ឌ។ អ្នកទាំង ២នាក់ ត្រូវតុលាការក្រុងភ្នំពេញកោះហៅកាលពីថ្ងៃទី១៦ ខែឧសភា ឲ្យចូលបំភ្លឺក្នុងសំណុំរឿងសញ្ចារកម្ម ពាក់ព័ន្ធរឿងអាស្រូវស្នេហារវាងលោក កឹម សុខា និងអ្នកនាង ខុម ចាន់តារាទី ហៅ ស្រីមុំ។
ទាក់ទងនឹងសុពលភាពសមាជិកសភារបស់លោក សម រង្ស៊ី វិញ លោក ឡេង ប៉េងឡុង បញ្ជាក់ថា អគ្គលេខាធិការដ្ឋានរដ្ឋសភា នឹងធ្វើលិខិតចម្លើយជូនតំណាងរាស្ត្រគណបក្សសង្គ្រោះជាតិ នៅពេលក្រោយ ពីព្រោះសមាជិកគណៈកម្មាធិការអចិន្ត្រៃយ៍នៃគណបក្សប្រជាជនកម្ពុជា និងគណបក្សសង្គ្រោះជាតិ មិនមានការឯកភាពគ្នានៅក្នុងកិច្ចប្រជុំនោះឡើយ។ លោក ឡេង ប៉េងឡុង ពន្យល់ថា ការផ្តល់សុពលភាពជូនលោក សម រង្ស៊ី ដោយសារតែនៅពេលនោះ រដ្ឋសភាមិនដឹងអំពីការសម្រេចរបស់តុលាការទៅលើករណីរបស់លោក សម រង្ស៊ី៖ «លិខិតរបស់ក្រសួងយុត្តិធម៌ និងរបាយការណ៍សុំអនុវត្តទោសដែលមានចែងក្នុងសាលដីការបស់តុលាការហ្នឹងហើយ ទើបរដ្ឋសភាចាត់វិធានការចេញសេចក្តីប្រកាសលេខ៦៧៧ ចុះថ្ងៃទី១៦ ខែវិច្ឆិកា ឆ្នាំ២០១៥។ អ៊ីចឹងពីមុនមក រដ្ឋសភាអត់បានដឹងអីទេ អត់មានដឹង ហើយក៏គ្មានអ្នកណាលើកដែរ ទើបតែតុលាការចេញសំបុត្រមក ទើបយើងមានការពាក់ព័ន្ធ ហើយក៏ចាត់វិធានការទៅតាមច្បាប់»។
ចំណែកនីតិវិធីដែលរដ្ឋសភាអនុញ្ញាតឲ្យតុលាការបន្តនីតិវិធីលើតំណាងរាស្ត្រមានអភ័យឯកសិទ្ធិវិញ លោក ឡេង ប៉េងឡុង បញ្ជាក់ថា រដ្ឋសភាយោងទៅតាមប្រការ៤១ នៃបទបញ្ជាផ្ទៃក្នុងសភា ដែលចែងអំពីសំឡេងភាគច្រើននៃសមាជិកសភាត្រូវចាត់ទុកជាបានការ។
ទោះបីជាយ៉ាងណា លោក អេង ឆៃអ៊ាង និងលោក យ៉ែម បុញ្ញឫទ្ធិ ដែលជាសមាជិកគណៈកម្មាធិការអចិន្ត្រៃយ៍រដ្ឋសភា មកពីគណបក្សសង្គ្រោះជាតិ មិនបានឯកភាពលើរបៀបវារៈទី២ និងទី៣ នោះទេ ដោយសំអាងថា វាផ្ទុយទៅនឹងច្បាប់ និងស្មារតីនៃរដ្ឋធម្មនុញ្ញដែលចែងអំពីអភ័យឯកសិទ្ធិសភា មិនអាចរំលោភបំពានបាន៖ «របៀបវារៈទី២ និងទី៣ យើងពន្យល់គ្នាទៅវិញទៅមកហើយ តែនៅតែពុំទាន់ទទួលបានការឯកភាពគ្នា និងយល់គ្នានៅឡើយ ពីព្រោះយើងនៅតែយល់ឃើញថា ការលើកអភ័យឯកសិទ្ធិត្រូវការសំឡេង ២ភាគ៣។ នោះជាចំណុចទី១។ ចំណុចទី២ គណៈកម្មាធិការអចិន្ត្រៃយ៍ចន្លោះសម័យប្រជុំរដ្ឋសភា មានសិទ្ធិប្រជុំដើម្បីធ្វើការសម្រេច ក៏ប៉ុន្តែប្រការ៨០ នៃរដ្ឋធម្មនុញ្ញនៅក្នុងកថាខណ្ឌទី៤ ចែងយ៉ាងច្បាស់ថា រាល់ការសម្រេចរបស់គណៈកម្មាធិការអចិន្ត្រៃយ៍ ត្រូវដាក់ជូនទៅសម័យប្រជុំសភាពេញអង្គ ដើម្បីអនុម័តដោយសំឡេង ២ភាគ៣។ ចំណុចទាំងអស់នេះហើយ ដែលយើងមិនមានការឯកភាពគ្នា»។
លោក យ៉ែម បុញ្ញឫទ្ធិ បញ្ជាក់ទៀតថា បើទោះជាមានការខ្វែងគំនិតគ្នាក្នុងការបកស្រាយក៏ដោយ ក៏ពួកលោកនៅតែព្យាយាមតស៊ូមតិតទៅទៀត ដើម្បីឲ្យមានការយល់គ្នារវាងសមាជិកសភាគណបក្សជាប់ឆ្នោតទាំងពីរ។
មាត្រា៨០ នៃរដ្ឋធម្មនុញ្ញចែងថា តំណាងរាស្ត្រមានអភ័យឯកសិទ្ធិសភា។ តំណាងរាស្ត្ររូបណាក៏ដោយ មិនអាចត្រូវបានចោទប្រកាន់ ចាប់ខ្លួន ឃាត់ខ្លួន ឬឃុំខ្លួន ដោយហេតុបានសម្ដែងយោបល់ ឬបញ្ចេញមតិក្នុងការបំពេញមុខងាររបស់ខ្លួនឡើយ។ ការចោទប្រកាន់ ការចាប់ខ្លួន ការឃាត់ខ្លួន ឬការឃុំខ្លួនសមាជិកណាមួយនៃរដ្ឋសភា នឹងអាចធ្វើទៅកើត លុះត្រាតែមានការយល់ព្រមពីរដ្ឋសភា ឬពីគណៈកម្មាធិការអចិន្ត្រៃយ៍របស់រដ្ឋសភា ក្នុងចន្លោះសម័យប្រជុំនៃរដ្ឋសភា វៀរលែងតែក្នុងករណីបទល្មើសព្រហ្មទណ្ឌជាក់ស្តែង៕
No comments:
Post a Comment