មន្ត្រីនិងសកម្មជនបក្សប្រឆាំងជាប់ឃុំ១៥នាក់កោរសក់កាន់ទុក្ខចំពោះមរណភាពលោកកែម ឡី
ដោយ ខែ សុណង
2016-07-16
លោក មាជ សុវណ្ណារ៉ា (ឆ្វេង) មន្ត្រីជាន់ខ្ពស់បក្សសង្គ្រោះជាតិ និងលោក អ៊ុក ពេជ្រសំណាង (ស្ដាំ) សកម្មជនបក្សសង្គ្រោះជាតិ ពេលនាំមកដល់តុលាការកំពូលនៅព្រឹកថ្ងៃទី១១ មីនា ២០១៥។
RFA/Morm Moniroth
មន្ត្រីនិងសកម្មជនគណបក្សសង្គ្រោះជាតិ ដែលកំពុងជាប់ឃុំក្នុងពន្ធនាគារព្រៃស ចំនួន ១៥នាក់ បានកោរសក់កាន់ទុក្ខ និងគោរពវិញ្ញាណក្ខន្ធលោកបណ្ឌិត កែម ឡី អ្នកស្រាវជ្រាវការអភិវឌ្ឍសង្គម ដែលបានទទួលមរណភាពដោយខ្មាន់កាំភ្លើងបាញ់សម្លាប់កាលពីថ្ងៃទី១០ កក្កដា។
អ្នកជាប់ឃុំក្នុងពន្ធនាគារដែលមានមន្ត្រី និងសកម្មជនបក្សប្រឆាំងផង បានប្រាប់មិនឲ្យក្រុមគ្រួសារ និងសាច់ញាតិរបស់ខ្លួនទៅសួរសុខទុក្ខអំឡុងពេលមួយសប្ដាហ៍ បន្ទាប់ពីបានទទួលដំណឹងថា លោកបណ្ឌិត កែម ឡី ត្រូវបានគេបាញ់សម្លាប់។
លោកស្រី ច័ន្ទ សុម៉ាលី ជាភរិយារបស់លោក មាជ សុវណ្ណារ៉ា មន្ត្រីគណបក្សសង្គ្រោះជាតិដែលកំពុងជាប់ឃុំក្នុងពន្ធនាគារព្រៃស បានឲ្យដឹងនៅថ្ងៃទី១៦ ខែកក្កដា ថា សកម្មជនគណបក្សសង្គ្រោះជាតិ ដែលកំពុងជាប់ឃុំក្នុងពន្ធនាគារព្រៃស ទាំងអស់បានកោរសក់កាន់ទុក្ខស្មិងស្មាធិ៍ក្នុងបន្ទប់ពន្ធនាគារមិនចេញទៅក្រៅបន្ទប់ឡើយ ដើម្បីគោរពវិញ្ញាណក្ខន្ធសពលោកបណ្ឌិត កែម ឡី៖ «គាត់ធ្វើតាំងពីដឹងព័ត៌មានលោកបណ្ឌិត កែម ឡី ទទួលមរណភាពបានមួយថ្ងៃ គាត់សោកស្ដាយដែលថា បាត់បង់អ្នកចេះដឹងម្នាក់ ជាមិត្តភក្តិក៏ដូចជាអ្នករួមការងារជាមួយគ្នា។ មិនថា តែពួកគាត់និយាយទៅប្រជាពលរដ្ឋខ្មែរយើងទូទាំងប្រទេស មិនថាតែយើងនៅស្រុកខ្មែរ ឬនៅក្រៅប្រទេសទេ ពួកគាត់មានការសោកស្ដាយហើយធ្វើពិធីកាន់ទុក្ខនេះ»។
ចំណែកភរិយាលោក អ៊ុក ពេជ្រសំណាង សកម្មជនគណបក្សសង្គ្រោះជាតិ ដែលកំពុងជាប់ឃុំនៅពន្ធនាគារព្រៃស គឺលោកស្រី ទិត្យ ណារិន ថ្លែងថា លោកស្រីបាននាំយកថវិកាចំនួន ២៣ម៉ឺនរៀលដែលសកម្មជន និងអ្នកជាប់ឃុំជាសកម្មជនផ្សេងទៀតរបស់គណបក្សប្រឆាំងបានផ្ញើពីពន្ធនាគារព្រៃស ដើម្បីចូលបុណ្យគោរពវិញ្ញាណក្ខន្ធលោកបណ្ឌិត កែម ឡី៖ «៧ថ្ងៃទាំងថ្ងៃនេះហើយដែលគាត់មិនចេញពីបន្ទប់ឃុំឃាំង ពីមុនមកគាត់បានចេញមកហាត់ប្រាណហាត់អីក្នុងមួយថ្ងៃបានចេញមកហាត់ម្នាក់មួយម៉ោង ២ម៉ោង គាត់អត់ព្រមចេញ គាត់តាំងស្មាធិ៍មិនចង់និយាយចង់ស្ដី»។
មន្ត្រីគណបក្សសង្គ្រោះជាតិ លោក មាជ សុវណ្ណារ៉ា និងសកម្មជនគណបក្សនេះជាង ១០នាក់ផ្សេងទៀតត្រូវបានសមត្ថកិច្ចចាប់ខ្លួនក្រោយព្រឹត្តិការណ៍ផ្ទុះហិង្សាកាលពីថ្ងៃទី១៥ ខែកក្កដា ឆ្នាំ២០១៤ នៅលើស្ពាននាគក្បែរទីលានប្រជាធិបតេយ្យ។ សាលាដំបូងរាជធានីភ្នំពេញបានសម្រេចផ្ដន្ទាទោសពួកគេដាក់ពន្ធនាគារចន្លោះពី ៧ឆ្នាំ ទៅ ២០ឆ្នាំ ពីបទចោទដឹកនាំធ្វើកុប្បកម្ម បទហិង្សាដោយចេតនា និងបទប្រឆាំងអ្នករាជការសាធារណៈ៕
No comments:
Post a Comment