លោក ហ៊ុន សែន ព្រមានជាថ្មីថាកុំប្រើប្រាស់ពណ៌ដើម្បីដាក់សម្ពាធរដ្ឋាភិបាល
ដោយ ម៉ម មុនីរតន៍
2016-05-10
លោកនាយករដ្ឋមន្ត្រី ហ៊ុន សែន ថ្លែងក្នុងពិធីចែកសញ្ញាប័ត្រដល់និស្សិត នាកោះពេជ្រ នៅថ្ងៃទី១៧ ខែមីនា ឆ្នាំ២០១៦។
RFA/Brach Chev
លោកនាយករដ្ឋមន្ត្រី បានព្រមានជាថ្មីទៀតថា កុំប្រើប្រាស់ពណ៌ក្រោមហេតុផលផ្សេងៗដើម្បីដាក់សម្ពាធប្រឆាំងរដ្ឋាភិបាល។ លោក ហ៊ុន សែន បញ្ជាក់ថា ការបង្ខំឲ្យរដ្ឋាភិបាលដើរដល់ផ្លូវទាល់ច្រក អាចនឹងមានស្ថានភាពមិនល្អប៉ុន្មាននោះទេ។
មន្ត្រីអង្គការមិនមែនរដ្ឋាភិបាលផ្នែកសិទ្ធិមនុស្ស យល់ឃើញថា លោក ហ៊ុន សែន ហាក់ដូចជាចង្អៀតចង្អល់ និងបិទសិទ្ធិសេរីភាពពលរដ្ឋ។
ប្រធានគណបក្សប្រជាជនកម្ពុជា ដែលកំពុងស្ថិតក្នុងតំណែងជានាយករដ្ឋមន្ត្រី បានប្រាប់ពីមធ្យោបាយសម្រាប់ច្រកចេញ ដើម្បីបញ្ចប់ការខ្វែងគំនិតគ្នានេះថា មានតែតតាំងតាមផ្លូវតុលាការតាមរយៈមេធាវីការពារក្ដីតែមួយគត់ ដែលជាជម្រើសដ៏ប្រសើរ ក្នុងសំណុំរឿងសុំឲ្យដោះលែងមន្ត្រីអង្គការអាដហុក (ADHOC) ៤រូប និងមន្ត្រី គ.ជ.ប ១រូប គឺលោក នី ចរិយា។
ការថ្លែងដូចនេះរបស់លោក ហ៊ុន សែន ធ្វើឡើងក្នុងពិធីចែកសញ្ញាបត្រនៅកោះពេជ្រ កាលពីព្រឹកថ្ងៃទី១០ ឧសភា។ លោកអះអាងថា ការជ្រើសរើសមធ្យោបាយប្រើប្រាស់ពណ៌ និងពេលវេលាក្រោមហេតុផលមួយចំនួននៅពេលនេះ គឺវាមិនមែនជាដំណោះស្រាយល្អឡើយ។ លោក ហ៊ុន សែន បន្តថា ប្រសិនបើមានចេតនាចង់ដោះស្រាយសំណុំរឿងនេះមែន ត្រូវតែប្រើយន្តការតុលាការវិញ ទើបស្របតាមច្បាប់ជាង។ លោកបន្តថា «ឥឡូវដំណើរការតាមផ្លូវច្បាប់រកវិធីដោះបន្ទុកតាមរយៈការផ្ដល់មេធាវី។ រកមេធាវីឲ្យពូកែ រកវិធីដោះស្រាយបន្ទុក ទើបជាបញ្ហាត្រឹមត្រូវតាមផ្លូវច្បាប់។ មិនអាចមកដាក់សម្ពាធតាមរយៈពណ៌នេះពណ៌នោះ ថ្ងៃនេះថ្ងៃនោះឥតទេ»។
ជុំវិញសំណុំរឿងនេះ លោក ហ៊ុន សែន អះអាងថា ផ្អែកលើគោលការណ៍ច្បាប់ នាយករដ្ឋមន្ត្រីអាចមានសិទ្ធិស្នើសុំឲ្យព្រះមហាក្សត្របន្ធូរបន្ថយទោស ក្រោយសាលក្រមចូលជាស្ថាពររួច។
យ៉ាងនេះក្ដី អង្គការសង្គមស៊ីវិល បង្ហាញការខកចិត្តចំពោះសារនយោបាយរបស់លោក ហ៊ុន សែន នៅពេលនេះ។ ពួកគេយល់ឃើញថា មនុស្សទាំង ៥នាក់នោះ រកពុំឃើញថាមានទោសដូចការចោទប្រកាន់ឡើយ។ ម្យ៉ាង ប្រសិនបើការអនុវត្តដូចនេះមែន នោះគ្រាន់តែជាមធ្យោបាយវ៉ៃហើយស្អំវិញប៉ុណ្ណោះ។ មិនតែប៉ុណ្ណោះ លោក សួន ប៊ុនស័ក្តិ កត់សម្គាល់ថា ការទទួលបានយុត្តិធម៌តាមផ្លូវតុលាការ គេហាក់មានសង្ឃឹមតិចតួចណាស់ ដោយសារមានបទពិសោធន៍គ្រប់គ្រាន់ក្នុងពេលកន្លងទៅ។ ប្រធានលេខាធិការដ្ឋានគណៈកម្មាធិការប្រព្រឹត្តិកម្ម នៃអង្គការសមាគមការពារសិទ្ធិមនុស្សកម្ពុជា រូបនេះ យល់ឃើញថា មានមនុស្សច្រើនណាស់បានបាត់បង់ជំនឿរួចទៅហើយលើតុលាការនេះ។
ក្រៅពីនេះ លោក ហ៊ុន សែន ក៏ព្រមានទៅដល់អ្នកដែលផ្ដល់លុយជាមធ្យោបាយក្នុងការបោះពុម្ពអាវ ដែលនាំឲ្យមានយុទ្ធនាការកន្លងមកនេះ។ លោកអះអាងថា អ្នកនៅពីក្រោយនៃចលនានេះ គឺលោកស្គាល់យ៉ាងច្បាស់ ហើយក៏ព្រមានដែរថា ល្មមបញ្ឈប់សកម្មភាពបែបនេះ ជាថ្នូរដើម្បីដាក់សម្ពាធឲ្យរដ្ឋាភិបាលដោះលែងអ្នកដែលជាប់ឃុំទាំង ៥នាក់នេះ។ លោក ហ៊ុន សែន ដៀមដាមថា ការធ្វើដូចនេះ គឺនាំទុក្ខឲ្យអ្នកដែលកំពុងជាប់ឃុំទៅវិញទេ ហើយក៏ពុំបានផ្ដល់ផលប្រយោជន៍អ្វីនោះថែមទៀតផង។
បើទោះបីជាបែបណា មជ្ឈដ្ឋាននានា ទាំងអង្គការសង្គមស៊ីវិលជាតិ និងអន្តរជាតិ បានរិះគន់ និងថ្កោលទោសចំណាត់ការរបស់រដ្ឋាភិបាលនៅពេលនេះ ថាជាការរារាំងទៅដល់ការអនុវត្តសិទ្ធិមនុស្សរបស់សង្គមស៊ីវិលទៅវិញទេ។
ប្រធានលេខាធិការដ្ឋានគណៈកម្មាធិការប្រព្រឹត្តិកម្ម នៃអង្គការសមាគមការពារសិទ្ធិមនុស្សកម្ពុជា លោក សួន ប៊ុនស័ក្តិ យល់ឃើញថា ការប្រើប្រាស់ពណ៌នៅកម្ពុជា វាពុំមែនស្ថិតនៅក្រោមបញ្ញត្តិនៃច្បាប់នោះឡើយ។ មិនតែប៉ុណ្ណោះ ការជ្រើសរើសពណ៌ខោអាវរបស់ពលរដ្ឋ គឺគ្រាន់តែជាវិធីមួយក្នុងការសម្ដែងមតិ ដែលមិនពេញចិត្តទៅលើទង្វើអ្វីមួយរបស់រដ្ឋាភិបាលប៉ុណ្ណោះ។ លោកបន្តថា ប្រសិនបើរដ្ឋាភិបាលបើកចិត្តឲ្យបានទូលាយជាងនេះបន្តិច ទំនងជាពុំមានបញ្ហាកើតឡើងទេ។ ផ្ទុយទៅវិញ បើការអនុវត្តដូចនេះរបស់រដ្ឋាភិបាល នោះបានន័យថា គឺជាការរើសអើងជាជាងអនុវត្តច្បាប់ទៅវិញ។ លោកបន្តថា «ខ្ញុំគិតថា ប្រសិនបើរដ្ឋាភិបាលអនុវត្តកាតព្វកិច្ចសិទ្ធិឲ្យបានពេញលេញ ការដែលប្រើប្រាស់ពណ៌អីផ្សេងៗហ្នឹង គឺឥតត្រូវចង្អៀតចង្អល់ទេ។ ការដែលយើងប្រើប្រាស់ពណ៌ក្នុងចេតនាអ្វីមួយ គ្រាន់តែសិល្បៈនៃការបញ្ចេញអារម្មណ៍ និងបញ្ចេញគំនិតតែប៉ុណ្ណោះ»។
ជាលទ្ធផល បន្ទាប់ពីអង្គការសង្គមស៊ីវិល ប្រកាសធ្វើយុទ្ធនាការថ្ងៃច័ន្ទពណ៌ខ្មៅ មិនទាន់បាន ៤ថ្ងៃស្រួលបួលផង សកម្មជនដីធ្លី និងមន្ត្រីសង្គមស៊ីវិល ៦នាក់ ត្រូវបានកម្លាំងសមត្ថកិច្ចឃាត់ខ្លួនពេញមួយថ្ងៃ កាលពីថ្ងៃទី៩ ឧសភា ម្សិលមិញ។ ជុំវិញបញ្ហានេះ លោក ហ៊ុន សែន អះអាងថា លោកដាក់ចេញនូវបទបញ្ជាគ្រប់រាជធានី-ខេត្ត-ក្រុង ត្រូវទប់ស្កាត់រាល់សកម្មភាពនានា ហើយបើនៅតែរឹងរូស ត្រូវចាប់ខ្លួន។ ទន្ទឹមនឹងនេះ លោកនាយករដ្ឋមន្ត្រី ក៏ព្រមានដែរថា អាជ្ញាធរ និងសមត្ថកិច្ចរបស់រដ្ឋ ត្រូវចាប់ខ្លួនទាំងអស់ មិនត្រូវប្រកាន់ពណ៌អ្វីឡើយ ឲ្យតែប្រព្រឹត្តបទល្មើស។
បញ្ហានេះ ត្រូវបានអង្គការមិនមែនរដ្ឋាភិបាល ចាត់ទុកថា លោក ហ៊ុន សែន មិនបានផ្ដល់សិទ្ធិស្មើគ្នាចំពោះមុខច្បាប់ដូចការអះអាងឡើយ។ ម្យ៉ាងទៀត បើរដ្ឋាភិបាលរកឃើញថា មនុស្សដែលត្រូវចោទប្រកាន់មាននិន្នាការខុសពីទស្សនៈខ្លួន និងការយល់ឃើញរបស់ខ្លួននោះ រដ្ឋាភិបាលមិនលើកលែងឲ្យនោះទេ គឺចាប់ខ្លួនទាំងអស់ក្រោមហេតុផលអនុវត្តច្បាប់។
ទាក់ទងនឹងរឿងនេះដែរ អង្គការសង្គមស៊ីវិលចំនួន ៧៤ នៅថ្ងៃទី១០ ឧសភា ចេញសេចក្តីថ្លែងការណ៍រួមថ្កោលទោសចំពោះការកើនឡើងនៃការបំភិតបំភ័យលើអ្នកការពារសិទ្ធិមនុស្សជាបន្តបន្ទាប់។
សង្គមស៊ីវិលស្នើសុំឲ្យរដ្ឋាភិបាលមានការធានាជាថ្មីថា សិទ្ធិ និងសេរីភាពជាមូលដ្ឋានរបស់អ្នកការពារសិទ្ធិមនុស្សក្នុងការអនុវត្តការងាររបស់ខ្លួន ត្រូវបានអនុវត្តដោយសេរី ជៀសផុតពីការបំភិតបំភ័យ និងការដាក់ទណ្ឌកម្ម។ សង្គមស៊ីវិលសម្តែងការសោកស្តាយចំពោះការចោទប្រកាន់ និងឃុំខ្លួនមន្រ្តីសិទ្ធិមនុស្ស និងមន្រ្តី គ.ជ.ប ទាំង ៥រូប និងស្នើឲ្យមានការដោះលែងពួកគេឲ្យនៅក្រៅឃុំបណ្តោះអាសន្នរង់ចាំសវនាការ៕
2 comments:
Dictator & Traitor Hun Sen lives and dies with his caveman's laws.
Some old cars can be repaired, Hun Sen car cannot, and must be junked !
Post a Comment