លោក កែវ រ៉េមី (ស្ដាំ) ក្នុងពេលធ្វើសន្និសីទកាសែតកាលពីម្សិលមិញ។ ហេង ជីវ័ន
លោក កែវ រ៉េមី គំរាមអង្គការក្រៅរដ្ឋាភិបាល
Tue, 10 May 2016 ppp
ម៉ិច ដារ៉ា and Shaun Turton
ភ្នំពេញៈ ប្រធានគណៈកម្មាធិការសិទិ្ធមនុស្សរបស់រដ្ឋាភិបាលដែលទើបតែតែងតាំងថ្មីកាលពីម្សិលមិញបានគំរាមអង្គការមិនមែនរដ្ឋាភិបាលមួយចំនួនថាអង្គការទាំងនោះអាចបិទទ្វារតាមច្បាប់ស្តីពីអង្គការមិនមែនរដ្ឋាភិបាលបើពួកគេបន្តជំរុញនូវអ្វីដែលលោកបានអះអាងថា «ភាពចលាចល» និង «អំពើហិង្សា»។
លោក កែវ រ៉េមី បានចោទប្រកាន់អង្គការ «មួយចំនួន» ថាបាននិងកំពុងតែជំរុញកម្ពុជាឲ្យធ្លាក់ចូលក្នុងសង្រ្គាមស៊ីវិលដោយព្យាយាម «ផ្តួលរំលំរដ្ឋាភិបាល» ក្រោម «ឆត្រសិទិ្ធមនុស្ស»។
លោក រ៉េមី ថ្លែងថា៖ «យើងព្រួយបារម្ភអំពីសកម្មភាពរបស់អង្គការសង្គមស៊ីវិលមួយចំនួនដែលហួសដែនកំណត់ក្នុងការអនុវត្តសិទ្ធិរបស់ខ្លួនដោយមិនគោរពច្បាប់ប្រទេសបង្កភាពអនាធិបតេយ្យ»។
លោកបន្ថែមថាលោកព្រួយបារម្ភថាកម្ពុជានឹងដើរតាមគន្លងបណ្តាប្រទេសនានាដែលរងការបំផ្លិចបំផ្លាញដោយសារសង្គ្រាមដូចជាស៊ីរី និងអ៊ីរ៉ាក់។ «មុនពេលវាធំវាចាប់ផ្តើមពីតូច។ ដូច្នេះរដ្ឋាភិបាលមានកាតព្វកិច្ចពង្រឹងសន្ដិសុខ និងរក្សាសណ្ដាប់ធ្នាប់សាធារណៈ។
លោកបញ្ជាក់ថា៖ «បើអង្គការសង្គមស៊ីវិលនៅតែបន្តសកម្មភាពដោយគ្មានការអនុញ្ញាតហើយពួកគេបានបង្កនូវអំពើហិង្សា និងភាពចលាចលតាមច្បាប់ស្តីពីអង្គការមិនមែនរដ្ឋាភិបាល និងសង្គមស៊ីវិលប្រសិនបើពួកគេបង្ករឿងនេះក្រសួងមហាផ្ទៃមានសិទ្ធិបិទសមាគម អង្គការ និងសង្គមស៊ីវិលនោះ»។
ការអត្ថាធិប្បាយរបស់លោក កែវ រ៉េមី កាលពីម្សិលមិញបានធ្វើឡើងបន្ទាប់ពីសមាជិក ៨ នាក់នៃសង្គមស៊ីវិលត្រូវបានឃាត់ខ្លួនដោយសារតែធ្វើការសម្តែងមតិដោយសន្តិវិធីប្រឆាំងនឹងការចាប់ខ្លួនសមាជិកបួននាក់នៃសមាគម អាដហុក និងមន្ត្រី គ.ជ.ប ម្នាក់ពាក់ព័ន្ធនឹងរឿងអាស្រូវស្នេហារបស់លោក កឹម សុខា មេដឹកនាំគណបក្សសង្គ្រោះជាតិ។
ក្រុមអ្នករិះគន់និយាយថារដ្ឋាភិបាលបានប្រើរឿងអាស្រូវនេះដើម្បីបង្ក្រាបមកលើបក្សប្រឆាំង និងសង្គមស៊ីវិលដោយប្រើបទចោទដែលមានមន្ទិលសង្ស័យផ្លូវច្បាប់។ ការព្រមានរបស់លោក រ៉េមី ក៏បន្ទរការអំពាវនាវនាពេលថ្មីៗនេះរបស់អង្គការមិនមែនរដ្ឋាភិបាលដែលគាំទ្ររដ្ឋាភិបាលឲ្យរដ្ឋាភិបាលប្រើប្រាស់ច្បាប់ស្តីពីអង្គការមិនមែនរដ្ឋាភិបាលដាក់ទោសទៅលើក្រុមសង្គមស៊ីវិលដូចជា សមាគម អាដហុក។
មាត្រា ៨ នៃច្បាប់នេះដែលត្រូវបានអនុម័តកាលពីខែកក្កដាឆ្នាំមុនអនុញ្ញាតឱ្យក្រសួងមហាផ្ទៃបិទអង្គការដែល «បង្កគ្រោះថ្នាក់ដល់សន្តិសុខ និងសណ្តាប់ធ្នាប់សាធារណៈ ឬធ្វើឱ្យប៉ះពាល់ដល់សន្តិសុខជាតិ ឯកភាពជាតិ វប្បធម៌ប្រពៃណី ទំនៀមទម្លាប់របស់សង្គមជាតិកម្ពុជា»។
លោក សឿង សារឿន នាយកប្រតិបត្តិនៃគណៈកម្មាធិការសហប្រតិបត្តិការដើម្បីកម្ពុជាកាលពីម្សិលមិញបានឱ្យដឹងថា៖ «នៅពេលដែលច្បាប់នេះត្រូវបានអនុម័តយើងព្រួយបារម្ភថាភាសាមិនច្បាស់លាស់ក្នុងច្បាប់អាចត្រូវបានបកស្រាយ ឬប្រើប្រាស់ក្នុងផ្លូវផ្សេង»។
លោកមេធាវី Billy Tai នៃគណៈកម្មាធិការប្រព្រឹត្តិកម្មនៃអង្គការសមាគមការពារសិទ្ធិមនុស្សកម្ពុជាបានថ្លែងថាវាច្បាស់ណាស់ដែលរដ្ឋាភិបាលបានពង្រីកការបង្រ្កាបនាពេលបច្ចុប្បន្នដើម្បីបំបិទមាត់អ្នករិះគន់ក្នុងសង្គមស៊ីវិល។
លោកបានថ្លែងថា៖ «គណៈកម្មាធិការសិទ្ធិមនុស្សកម្ពុជាគ្មានភាពស្របច្បាប់ជាវិទ្យាស្ថានសិទ្ធិមនុស្សឯករាជ្យទេដូច្នេះអាចត្រូវបានចាត់ទុកថាជានាយកដ្ឋានមួយទៀតដែលគ្រប់គ្រងដោយគណបក្សប្រជាជន»។
លោក Billy Tai បានបញ្ជាក់ថា៖ «ឥឡូវនេះវាត្រូវបានពង្រីកមកគំរាមកំហែងដល់អង្គការមិនមែនរដ្ឋាភិបាលឲ្យដើរស្របជួរ ឬច្បាប់ស្តីពីអង្គការមិនមែនរដ្ឋាភិបាលនឹងត្រូវយកមកប្រើដើម្បីបិទអង្គការ»៕ TK
2 comments:
AH NGUYEN KAO KY KEO REMY,
Go back to your country . Warning Kanduoy Mer Eung Ey Ah Kantorb !!
Money is Monkey talks !
Post a Comment