លោក ហ៊ុន ម៉ាណែត មិនបានចូលបំភ្លឺតុលាការអាមេរិកនោះទេ
ដោយ យន់ សាមៀន
2016-05-14
លោក ហ៊ុន ម៉ាណែត (ឆ្វេង) មេបញ្ជាការរងកងទ័ពជើងគោក និងជានាយរងសេនាធិការចម្រុះនៃកងយោធពលខេមរភូមិន្ទ ថ្លែងក្នុងពិធីរៀបចំការចូលប្រឡងជ្រើសរើសនាយទាហាន កាលពីថ្ងៃទី២០ ខែធ្នូ ឆ្នាំ២០១៥។
RFA/Brach Chev
លោក ហ៊ុន ម៉ាណែត មន្ត្រីជាន់ខ្ពស់យោធា និងជាកូនប្រុសច្បងរបស់លោកនាយករដ្ឋមន្ត្រី ហ៊ុន សែន មិនបានចូលខ្លួនទៅបំភ្លឺតុលាការសហព័ន្ធអាមេរិក នៅក្រុងឡូសអែនជឺឡេស (Los Angeles) ពីបទធ្វើទារុណកម្ម និងអំពើភេរវកម្មនោះទេ។
លោក មូរតុន ក្លារ (Morton Sklar) ជាមេធាវីរបស់ភរិយា លោក មាជ សុវណ្ណារ៉ា ដែលបានប្ដឹងលោក ហ៊ុន ម៉ាណែត បញ្ជាក់ថា លោក ហ៊ុន ម៉ាណែត មិនបានទៅឆ្លើយការពារខ្លួនក្នុងរយៈពេល ៣០ថ្ងៃ បន្ទាប់ពីបណ្ដឹងប្រឆាំងលោកត្រូវបានដាក់កាលពីដើមខែមេសា នោះទេ។
លោកបន្តថា លោកនឹងដាក់សំណើទៅតុលាការដើម្បីចេញដីកាបញ្ជាក់ថា ដើមបណ្ដឹងឈ្នះក្ដី។ ដីកាបញ្ជាក់ថា ដើមបណ្ដឹងឈ្នះក្ដីនេះ ជាជំហានទីមួយដើម្បីព្រមានទៅដល់ចុងចោទដែលមិនបានចូលបំភ្លឺតាមការកំណត់។ លោក មូរតុន ក្លារ ព្រមានថា លោក ហ៊ុន ម៉ាណែត អាចប្រឈមមុខនឹងបញ្ហាច្បាប់ ប្រសិនបើលោកបន្តមិនបង្ហាញខ្លួន ឬជួលមេធាវីការពារក្ដី។
លោករំលឹកថា កាលពីឆ្នាំ២០០៥ លោកធ្លាប់ប្ដឹងឪពុកលោក ហ៊ុន ម៉ាណែត គឺលោក ហ៊ុន សែន ពីបទពាក់ព័ន្ធនឹងការបោកគ្រាប់បែកកាលពីឆ្នាំ១៩៩៧ បានជោគជ័យម្ដងរួចមកហើយ នៅតុលាការទីក្រុងញីវយ៉ក (New York) ដោយសារតែលោក ហ៊ុន សែន អវត្តមាននៅពេលតុលាការបើកសវនាការ។
កាលនោះ លោក មូរតុន ក្លារ ជាមេធាវីការពារក្ដីឲ្យលោក សម រង្ស៊ី ប្រធានគណបក្សសង្គ្រោះជាតិ ប៉ុន្តែដោយសារតែការសម្របសម្រួលនយោបាយ ករណីនេះត្រូវបានមេដឹកនាំគណបក្សទាំងពីរបញ្ចប់។
លោក ហ៊ុន ម៉ាណែត ធ្លាប់អះអាងថា លោកមិនបានដឹងពីបណ្ដឹងប្រឆាំងនឹងលោកនោះទេ ហើយលោកបានបដិសេធចំពោះការចោទប្រកាន់នោះ៖ «ករណី លោក មាជ សុវណ្ណារ៉ា ខ្ញុំមិនបានឃើញដីកានោះទេ ប៉ុន្តែខ្ញុំគ្រាន់ដឹងតាមព័ត៌មានប្ដឹងខ្ញុំប៉ុន្មានចំណុច រួមទាំងភេរវកម្មអន្តរជាតិ។ ខ្ញុំកប់យោបល់ ព្រោះបើជ្រុលប្ដឹងដាក់រឿងអ្វីឲ្យសមហេតុផល»។
លោក ហ៊ុន ម៉ាណែត ក៏អាចជាប់ពាក់ព័ន្ធនឹងបណ្ដឹងឧក្រិដ្ឋមួយផ្សេងទៀត ពីបទបង្ករបួសស្នាមទៅលើលោក ផល ហេយស៍ (Paul Hayes) ជាស្មៀនបញ្ជូនដីកាតុលាការ។ លោក ផល ហេយស៍ ចោទថា អង្គរក្សលោក ហ៊ុន ម៉ាណែត ប្រើអំពើហិង្សាលើកឡើងលើ ហើយបោកទៅលើថ្មបរិវេណភោជនីយដ្ឋានមួយ កាលពីថ្ងៃសៅរ៍ ទី៩ ខែមេសា នៅពេលលោកហៅឈ្មោះ លោក ហ៊ុន ម៉ាណែត ហើយឈោងហុចលិខិតជូនដំណឹងពីបណ្ដឹងមួយច្បាប់ទៅឲ្យលោក ម៉ាណែត។
សមត្ថកិច្ចនៅក្រុងឡូសអែនជឺឡេស បានទៅស៊ើបអង្កេតករណីវាយប្រហារជនជាតិអាមេរិកនេះ។ ពេលបញ្ចប់ការសាកសួរនោះ លោក ផល ហេយស៍ បានយល់ព្រមឲ្យសមត្ថកិច្ចបើកការស៊ើបអង្កេតបទឧក្រិដ្ឋនេះ៕
No comments:
Post a Comment