A Change of Guard

សូមស្តាប់វិទ្យុសង្គ្រោះជាតិ Please read more Khmer news and listen to CNRP Radio at National Rescue Party. សូមស្តាប់វីទ្យុខ្មែរប៉ុស្តិ៍/Khmer Post Radio.
Follow Khmerization on Facebook/តាមដានខ្មែរូបនីយកម្មតាម Facebook: https://www.facebook.com/khmerization.khmerican

Tuesday, 10 May 2016

អ្នក​វិភាគ​ស្នើ​ឲ្យ ACU ស៊ើប​អង្កេត​អ្នក​ផ្ដល់​លុយ​ដ៏​ច្រើន​ដល់​កាកបាទ​ក្រហម​កម្ពុជា


ដោយ ម៉ម មុនីរតន៍
2016-05-08



ប្រធាន​អង្គភាព​ប្រឆាំង​អំពើ​ពុក​រលួយ លោក ឱម យ៉ិនទៀង ថ្លែង​កាល​ពី​ថ្ងៃ​ទី​២៥ ខែ​មេសា ឆ្នាំ​២០១៦។ RFA/Leng Maly
RFA/Leng Maly



នៅ​ក្នុង​ទិវា​កាកបាទ​ក្រហម​អឌ្ឍចន្ទ​ក្រហម​លើក​ទី​១៥៣ ឆ្នាំ​នេះ ប្រមុខ​រដ្ឋាភិបាល បាន​អំពាវនាវ​ជា​ថ្មី​ទៀត សូម​ឲ្យ​អ្នក​មាន​ធនធាន​ទ្រព្យ​សម្បត្តិ ជួយ​បរិច្ចាគ​លុយ​ផ្ទាល់​ខ្លួន​ដើម្បី​សង្គម និង​ជួយ​ជន​រងគ្រោះ។ គេ​សង្កេត​ឃើញ​ថា ក្រោយ​ការ​អំពាវនាវ​របស់​លោក ហ៊ុន សែន ភ្លាម មាន​អ្នក​ឧកញ៉ា អង្គ​ទូត និង​អ្នក​ដែល​ប្រកប​អាជីវកម្ម​កម្រិត​មធ្យម និង​ខ្នាត​ធំ បាន​ចូលរួម​ផ្ដល់​លុយ​ជា​បន្តបន្ទាប់។

អ្នក​សិក្សា​ការ​អភិវឌ្ឍ​សង្គម យល់​ឃើញ​ថា អង្គភាព​ប្រឆាំង​អំពើ​ពុក​រលួយ (ACU) ត្រូវ​តែ​សិក្សា និង​ស៊ើប​អង្កេត​លុយ​ទាំង​នេះ ថា​តើ​អ្នក​ផ្ដល់​លុយ​ទាំង​នោះ​បាន​លុយ​មក​ពីណា អាច​មាន​ករណី​ប្រព្រឹត្ត​អំពើ​ពុក​រលួយ​ដែរ​យ៉ាង​ណា?

លុយ​មិន​តិច​ជាង ១៣​លាន​ដុល្លារ​ទេ ដែល​កាកបាទ​ក្រហម​ទទួល​បាន​ក្នុង​ឆ្នាំ​នេះ ក្រោយ​ពី​បញ្ចប់​ពិធី​ខួប​លើក​ទី​១៥៣ ឆ្នាំ​នៃ​ទិវា​កាកបាទ​ក្រហម និង​អឌ្ឍចន្ទ​ក្រហម​ពិភពលោក សម្រាប់​ថ្ងៃ​ទី​៨ ឧសភា។

បើ​ទោះ​បី​ជា​បែប​ណា អ្នក​សិក្សា​ការ​អភិវឌ្ឍ​សង្គម​វិញ រិះគន់​ថា បញ្ហា​លុយ​ដែល​អ្នក​រក​ស៊ី និង​ឧកញ៉ា​មួយ​ចំនួន​បាន​ផ្ដល់​ដល់​កាកបាទ​ក្រហម​នៅ​ពេល​នេះ អាច​មាន​មន្ទិល​សង្ស័យ ថា​អាច​ជា​ករណី​លាង​លុយ​កខ្វក់​ក៏​អាច​ថា​បាន។ បញ្ហា​នេះ ស្ថាប័ន​ប្រឆាំង​អំពើ​ពុក​រលួយ ត្រូវ​បើក​ការ​ស៊ើប​អង្កេត ដើម្បី​ឲ្យ​ប្រាកដ​ថា ប្រភព​លុយ​ដែល​បាន​បរិច្ចាគ​នេះ អាច​ជា​លុយ​ស្អាតស្អំ ឬ​យ៉ាង​ណា។



អ្នក​សិក្សា​ការ​អភិវឌ្ឍ​សង្គម លោក មាស នី មាន​ប្រសាសន៍​ថា អង្គភាព​ប្រឆាំង​អំពើ​ពុក​រលួយ ដែល​គ្រប់គ្រង​ដោយ​លោក ឱម យ៉ិនទៀង ត្រូវ​ពិនិត្យ​លើ​ការ​ផ្ដល់​លុយ​ដ៏​ច្រើន​លើសលប់​នេះ ដើម្បី​ធានា​ថា ជា​លុយ​ដែល​មិន​ជាប់​ពាក់ព័ន្ធ​នឹង​អំពើ​ពុក​រលួយ។ លោក​បន្ត​ថា ភាព​ស្មុគស្មាញ​នេះ មាន​បញ្ហា​ច្រើន​ណាស់ ដោយ​រាប់​ចាប់​ពី​ស្ថាប័ន​កាកបាទ​ក្រហម​នេះ​ឡើង។ ក៏ប៉ុន្តែ​បញ្ហា​នេះ​នៅ​ត្រង់​ថា អង្គភាព​ប្រឆាំង​អំពើ​ពុក​រលួយ គេ​សង្កេត​ឃើញ​ថា កម្រ​ធ្វើ​កិច្ចការ​ក្នុង​ការ​ប្រយុទ្ធ​ប្រឆាំង​អំពើ​ពុក​រលួយ​ណាស់ លុះត្រា​តែ​មាន​បណ្ដឹង ទើប​អាច​ដំណើរ​ការ​រឿង​ក្ដី​បាន។ នេះ​ជា​មូលហេតុ​មួយ​ដែល​ធ្វើ​ឲ្យ​មាន​មន្ទិល​សង្ស័យ​ថា លុយ​ដែល​បាន​បរិច្ចាគ​នេះ អាច​ជា​មធ្យោបាយ​លាង​ខ្លួន​ផង​ក៏​អាច​ថា​បាន​ដែរ។ លោក​បន្ត​ថា «ខ្ញុំ​គិត​ថា​ទី​មួយ សំខាន់​យើង​ចាប់​ផ្ដើម​ពី​ស្ថាប័ន​កាកបាទ​ក្រហម​ខ្លួន​ឯង ថា​តើ​ស្ថាប័ន​កាកបាទ​ក្រហម​ហ្នឹង​ផ្អែក​ទៅ​លើ​គុណ​តម្លៃ​អ្វី? បើ​សិន​ជា​ផ្អែក​ទៅ​លើ​គុណ​តម្លៃ​យុត្តិធម៌ សមធម៌ ហើយ​និង​ការ​ជួយ​សង្គ្រោះ​ជីវិត​មនុស្ស កាកបាទ​ក្រហម មិន​គិត​ត្រឹម​តែ​ការ​ប្រមូល​លុយ​យក​មក ហើយ​យក​ទៅ​ជួយ​ដល់​ជន​រងគ្រោះ​នោះ​ទេ ព្រោះ​លុយ​ខ្លះ​បាន​យក​មក​ជួយ​កាកបាទ​ក្រហម ក៏​អាច​ជា​លុយ​កខ្វក់​ដែរ»។

គេ​សង្កេត​ឃើញ​ថា ក្នុង​ពេល​ពិធី​ត្រូវ​បាន​បិទ​បញ្ចប់​ភ្លាម មនុស្ស​មួយ​ចំនួន​ដែល​ស្និទ្ធ​នឹង​រដ្ឋាភិបាល ក៏​បាន​ផ្ដល់​លុយ​ដ៏​ច្រើន​ក្នុង​ទំហំ​ទឹក​ប្រាក់​ដ៏​ច្រើន។ បញ្ជី​ឈ្មោះ​ដែល​គេ​ផ្សព្វផ្សាយ បាន​បង្ហាញ​អ្នក​ដែល​បរិច្ចាគ​ច្រើន​ជាង​គេ គឺ​ម្ចាស់​ក្រុមហ៊ុន​សាងសង់​ផ្ទះ​ពិភព​ថ្មី ផ្ដល់​ជូន​ជាង ១​លាន ២​សែន​ដុល្លារ​សហរដ្ឋ​អាមេរិក។ ដោយឡែក​នៅ​ឆ្នាំ​នេះ គេ​សង្កេត​ឃើញ​ស្ថានទូត​ពីរ​ប្រចាំ​កម្ពុជា បាន​ផ្ដល់​លុយ​ដល់​កាកបាទ​ក្រហម​ដែរ ក្នុង​នោះ​ស្ថានទូត​ចិន ចំនួន ១​ម៉ឺន​ដុល្លារ។ ការ​បរិច្ចាគ​ដែល​មាន​ចំនួន​តិច​ជាង​គេ គឺ​ស្ថានទូត​ភូមា ដែល​មាន​ចំនួន ៥០​ដុល្លារ។ តួលេខ​នេះ នៅ​មិន​ទាន់​គិត​ដល់​ឧកញ៉ា និង​ឈ្មួញ​រក​ស៊ី​ធំៗ​មួយ​ចំនួន​ទៀត​នៅ​ឡើយ​ផង។

របាយការណ៍​ដែល​ត្រូវ​គេ​ផ្សព្វផ្សាយ​ជា​សាធារណៈ បាន​បង្ហាញ​ថា លុយ​ដែល​កាកបាទ​ក្រហម​ទទួល​បាន​ពី​ការ​បរិច្ចាគ​នេះ មាន​ចំនួន​ជាង ១៣​លាន ៤​សែន​ដុល្លារ​អាមេរិក។

ឆ្លើយ​តប​ការ​ចោទ​ប្រកាន់​នេះ ប្រធាន​អង្គភាព​ប្រឆាំង​អំពើ​ពុក​រលួយ លោក ឱម យ៉ិនទៀង ប្រតិកម្ម​ថា ការ​លើក​ឡើង​របស់​អ្នក​ស្រាវជ្រាវ​ការ​អភិវឌ្ឍ គឺ​ជា​ការ​រិះគន់​ដែល​ឡប់​សតិ។ លោក​បន្ត​ថា «គាត់​ហ្នឹង​កើត​ជំងឺ​សរសៃ​ប្រាសាទ​ទេ​ដឹង ដែល​គាត់​ចេះ​តែ​លើក​អ៊ីចឹង»។

អ្នក​វិភាគ​សង្គម​សង្កេត​ឃើញ​ថា ការ​បរិច្ចាគ​លុយ​កាក់ និង​ធនធាន​កន្លង​ទៅ​នេះ​របស់​ឧកញ៉ា និង​ឈ្មួញ​ខ្លះ គឺ​ដើម្បី​បាន​សុខ ជាពិសេស​ចៀសវាង​ការ​គំរាម​កំហែង​សម្រាប់​អាជីវកម្ម​ផ្ទាល់​ខ្លួន ក៏ប៉ុន្តែ​ពេល​ខ្លះ ការ​ផ្ដល់​លុយ​របស់​មនុស្ស​ចំនួន អាច​ស្ថិត​ក្រោម​ហេតុផល​ដើម្បី​បាន​បុណ្យ​ស័ក្ដិ កិត្តិយស និង​មុខ​តំណែង​ក៏​អាច​ថា​បាន​ខ្លះ​ដែរ។

ថ្លែង​នៅ​ក្នុង​ទិវា​កាកបាទ​ក្រហម និង​អឌ្ឍចន្ទ​ក្រហម នៅ​ទីស្នាក់ការ​កណ្ដាល​កាកបាទ​ក្រហម​កម្ពុជា ក្នុង​រាជធានី​ភ្នំពេញ លោក​នាយក​រដ្ឋមន្ត្រី ហ៊ុន សែន បាន​អំពាវនាវ​ជា​ថ្មី​ទៀត ដោយ​ស្នើ​ឲ្យ​អ្នក​មាន​ធនធាន ត្រូវ​ហ៊ាន​បរិច្ចាគ​ទ្រព្យ​សម្បត្តិ​ផ្ទាល់​ខ្លួន ដើម្បី​ជួយ​ជន​រងគ្រោះ។ លោក ហ៊ុន សែន ចាត់​ទុក​ថា ការ​រួម​ចំណែក​នៅ​ពេល​នេះ គឺ​ជា​ការ​រួម​គ្នា​ក្នុង​ការ​កសាង​ប្រទេស ស្រប​ពេល​ពិភពលោក​កំពុង​រង​ការ​គំរាម​កំហែង​ដោយ​គ្រោះ​រាំង​ស្ងួត។ លោក​បន្ត​ថា «ខ្ញុំ​សង្ឃឹម​ថា​ការ​យោគយល់ ការ​ចូលរួម​ពី​សំណាក់​បង​ប្អូន​សប្បុរសជន នៅ​តែ​បន្ត​ដោះស្រាយ​កង្វល់ និង​ការ​លំបាក​របស់​ប្រជាជន។ កិច្ចការ​មនុស្សធម៌ ពិត​ជា​គ្មាន​ព្រំដែន​នោះ​ទេ ហើយ​គ្រោះ​មហន្តរាយ​ក៏​គ្មាន​ព្រំដែន​នោះ​ដែរ»។

ប្រធាន​ស្តីទី​គណបក្ស​ប្រឆាំង លោក កឹម សុខា ថ្លែង​កាល​ពី​ពេល​ថ្មីៗ​នេះ​ថា ដើម្បី​ឲ្យ​ប្រទេស​មាន​ការ​អភិវឌ្ឍ​ជឿនលឿន​ទៅ​បាន លុះត្រា​តែ​រដ្ឋាភិបាល​បោស​សម្អាត​អំពើ​ពុក​រលួយ​ឲ្យ​បាន​ស្អាតស្អំ​ជា​មុន​សិន។ អំពើ​ពុក​រលួយ​ដែល​លោក កឹម សុខា ចាត់​ទុក​ថា​កំពុង​តែ​ញាំញី​នៅ​ក្នុង​សង្គម​ស្ទើរ​ក្លាយ​ទៅ​ជា​ប្រព័ន្ធ​ទៅ​ហើយ​នោះ គឺ​សំដៅ​ដល់​ពុក​រលួយ​ចាប់​ពី​ថ្នាក់​ជាតិ​រហូត​ដល់​មូលដ្ឋាន។

ក្រៅ​ពី​នេះ​វិញ អ្នក​ឃ្លាំ​មើល​ការ​អភិវឌ្ឍ​យល់​ឃើញ​ថា កំណែ​ទម្រង់​ក្នុង​ការ​ប្រយុទ្ធ​ប្រឆាំង​អំពើ​ពុក​រលួយ សព្វថ្ងៃ​នេះ គឺ​ធ្វើ​ឡើង​សើៗ និង​គ្រាន់​តែ​ធ្វើ​ឲ្យ​ល្អ​មើល​ប៉ុណ្ណោះ៕

2 comments:

Anonymous said...



ហេតុអ្វីបានជាខ្មែរហៅមនុស្សល្ងង់ថា :

"អាល្ងឺពកថ្ងាស់"

តើមានរឿងនិទានឬសុភាសិតអ្វីសំរាប់ផ្អែកលើឃ្លាខាងលើឬទេ?



Anonymous said...

Hun Sen Chkuot Mern Tern Heuy !!
Yumphubal came to get him but he does not want to go. That's why he acts so crazy.

Ah Om Yap Teang Pork Thngas but he can put Khmer people in jail.

And Mi Mer Thmub Men Sam An is still controlling Ah Kwack.

Ah Kwack Hun Sen, you are still a Yuon's puppet