មន្ត្រីសិទ្ធិមនុស្សអាដហុកត្រូវបានតុលាការកោះហៅរឿងសំណង់ខុសច្បាប់
ដោយ ម៉ម មុនីរតន៍
2016-02-09
មន្ត្រីការពារសិទ្ធិមនុស្សនៃសមាគមអាដហុក (ADHOC) លោក យី សុខសាន្ត ផ្ដល់បទសម្ភាសន៍នៅមុខសាលាដំបូងរាជធានីភ្នំពេញ នៅថ្ងៃទី៩ កុម្ភៈ ឆ្នាំ២០១៦។
RFA/Morm Moniroth
មន្ត្រីការពារសិទ្ធិមនុស្សនៃសមាគមអាដហុក (ADHOC) ម្នាក់ត្រូវបានអតីតអនុប្រធានមន្ទីរសុរិយោដីរាជធានីភ្នំពេញ ប្ដឹងឡើងតុលាការពីដំណើររឿងសុំឲ្យរុះរើសំណង់ខុសច្បាប់។
មន្ត្រីការពារសិទ្ធិមនុស្ស លោក យី សុខសាន្ត ដែលត្រូវបានគេប្ដឹងជាប់ពាក់ព័ន្ធសំណង់ខុសច្បាប់នេះ បានហៅការអនុវត្តនីតិវិធីរបស់តុលាការក្រុងភ្នំពេញ ថា ជាការរើសអើង។ ផ្ទុយទៅវិញ អតីតអនុប្រធានមន្ទីរសុរិយោដីរាជធានីភ្នំពេញ អះអាងថា ការអនុវត្តច្បាប់របស់តុលាការនៅពេលនេះ គឺជាការផ្ដល់ភាពត្រឹមត្រូវ និងយុត្តិធម៌ចំពោះលោក។
លោក យី សុខសាន្ត ចាត់ទុកការអនុវត្តច្បាប់របស់មន្ត្រីតុលាការក្រុងភ្នំពេញ ក្នុងសំណុំរឿងរដ្ឋប្បវេណីនេះថា ប្រព្រឹត្តទៅមានភាពលម្អៀង និងរើសអើងចំពោះមន្ត្រីអង្គការមិនមែនរដ្ឋាភិបាលដូចលោក។
លោក យី សុខសាន្ត មន្ត្រីសមាគមការពារសិទ្ធិមនុស្សអាដហុក ត្រូវបានអនុប្រធានតុលាការក្រុងភ្នំពេញ លោក កោ វណ្ឌី ចេញដីកាឲ្យចូលបំភ្លឺនៅថ្ងៃទី៩ ខែកុម្ភៈ អំពីដំណើររឿងសុំរុះរើសំណង់ខុសច្បាប់ ដែលមានដើមបណ្ដឹងលោក សូ សុវណ្ណារី អតីតអនុប្រធានមន្ទីរសុរិយោដីរាជធានីភ្នំពេញ។
ជុំវិញវិវាទនេះ លោក យី សុខសាន្ត អះអាងថា លោកបានប្ដឹងឈ្មោះ សូ សុវណ្ណារី មន្ត្រីចូលនិវត្តន៍ជាអនុប្រធានមន្ទីរសុរិយោដីនេះ តាំងពីឆ្នាំ២០១៤ មកម្ល៉េះ ក៏ប៉ុន្តែតុលាការមិនចាត់វិធានការឡើយ គឺបណ្ដឹងត្រូវកប់ទុក បើទោះជាកំពុងមានវិវាទក្តី។
លោកបន្ថែមថា ផ្ទុយទៅវិញ នៅពេលមានបណ្ដឹងពីឈ្មោះ សូ សុវណ្ណារី ក្នុងខែកុម្ភៈ នេះមិនទាំងបានប៉ុន្មានថ្ងៃស្រួលបួលផង មន្ត្រីតុលាការអនុវត្តដីកាដ៏ឆាប់រហ័សមួយរំពេច។ លោកចាត់ទុកថា ភាពយឺតយ៉ាវរបស់មន្ត្រីតុលាការ ក្នុងការអនុវត្តបណ្ដឹងនេះ អាចបញ្ជាក់បានថា ជាការប្រព្រឹត្តទៅដោយមានភាពលម្អៀង និងរើសអើងសង្គមស៊ីវិល។ លោកបន្តថា «ខ្ញុំមើលមកដល់ពេលនេះ គឺជាងមួយឆ្នាំហើយ។ ខ្ញុំមើលនីតិវិធីរបស់តុលាការដែលមានលោកព្រះរាជអាជ្ញា លោក កោ វណ្ឌី ជាអនុប្រធានតុលាការរាជធានីភ្នំពេញ និងលោក សុខ ប៊ុន្នី ជាក្រឡាបញ្ជី។ ខ្ញុំឃើញចំណាត់ការរបស់គាត់ហាក់បីដូចជាមានការអល់អែក រារែក និងមានការរើសអើងអង្គការសង្គមស៊ីវិល»។
វិទ្យុអាស៊ីសេរី ព្យាយាមសុំការបំភ្លឺពីលោក កោ វណ្ឌី អនុប្រធានតុលាការក្រុងភ្នំពេញ តាមទូរស័ព្ទដែរ ក៏ប៉ុន្តែពុំមានការឆ្លើយតបនៅថ្ងៃទី៩ ខែកុម្ភៈ។
ឆ្លើយតបការចោទប្រកាន់នេះ អតីតអនុប្រធានមន្ទីរសុរិយោដីរាជធានីភ្នំពេញ លោក សូ សុវណ្ណារី ថ្លែងថា លោកមិនចង់ប្ដឹងផ្ដល់នាំឲ្យមានវិវាទទេ។ ក៏ប៉ុន្តែដោយគ្មានជម្រើស ម្យ៉ាងទៀត លោកបានផ្ដល់លុយមួយចំនួនសម្រាប់ការជួសជុលចំពោះការខូចខាតរួចហើយ តែមន្ត្រីការពារសិទ្ធិមនុស្សរូបនេះ នៅតែមិនស្ងប់ចិត្ត។ ជាងនេះទៀត លោក សូ វណ្ណារី ចាត់ទុកថា ជាទម្លាប់របស់លោក យី សុខសាន្ត តែងប្ដឹងលោកគ្រប់ច្រកល្ហក តែលោកនៅតែមានការអត់ធ្មត់។ លោកបន្តថា «គាត់ប្ដឹងរួច តុលាការគេថាដល់ធ្វើចប់ហើយ គឺចប់សាច់រឿងហើយ។ វាឥតមានអី ហើយខ្ញុំក៏បានប្រគល់លុយ ៣៥០ដុល្លារឲ្យទៅធ្វើទៀត និងមកពីគាត់មិនយកទៅធ្វើ។ គាត់ចង់បានលុយច្រើន។ មនុស្សគាត់ក្រឡេចក្រឡុចពុតត្បុតអាក្រក់»។
ជុំវិញទំនាស់នេះ លោក យី សុខសាន្ត យល់ឃើញពីភាពយឺតយ៉ាវរបស់តុលាការ មិនចាត់វិធានការចំពោះបណ្ដឹងរបស់លោកប្រឆាំងមន្ត្រីចូលនិវត្តន៍នេះ ទំនងមានផលប្រយោជន៍ច្រើនជាងការអនុវត្តនីតិវិធី។ មន្ត្រីការពារសិទ្ធិមនុស្សរូបនេះ អះអាងថា លោកបានប្ដឹងលោក សូ សុវណ្ណារី តាំងពីខែមករា ឆ្នាំ២០១៤ ពីបទសំណង់ខុសច្បាប់ ដូចជាសង់លើសគម្រោងរហូត ៦ជាន់ ដែលច្បាប់សាងសង់សុំត្រឹម ៣ជាន់។ ម្យ៉ាងទៀត ច្បាប់សាងសង់ផុតទៅហើយ ប៉ុន្តែមិនព្រមស្នើសុំសាងសង់ឡើងវិញជាដើម។ ផ្ទុយមកវិញ បែរជាតុលាការទុកឱកាសឲ្យលោក សូ សុវណ្ណារី សាងសង់សំណង់ជិតរួច ហើយថែមទាំងប្ដឹងបកប្រឆាំងលោកវិញទៀត។
លោក អំ សំអាត មន្ត្រីជាន់ខ្ពស់អង្គការសិទ្ធិមនុស្សលីកាដូ (LICADHO) យល់ឃើញថា សព្វថ្ងៃនេះភាគច្រើនគេពុំយកច្បាប់ជាគោលទេ គឺគេតែងនិយាយពីអំណាចវិញ។ ម្យ៉ាងវិញទៀត ការអនុវត្តច្បាប់របស់មន្ត្រីតុលាការ ពឹងផ្អែកច្រើនណាស់ទៅលើលុយ។ អ្នកដែលមានលុយសូកប៉ាន់តុលាការ គឺមានឱកាសឈ្នះក្ដីជាងមនុស្សដែលរង់ចាំភាពយុត្តិធម៌។ លោកបន្តថា «បើយើងមើលទៅលើស្ថានភាពជាក់ស្ដែង វាខុសអំពីគោលការណ៍នៃច្បាប់មួយចំនួន។ បានន័យថា រឿងខ្លះបើអ្នកមានលុយមានបុណ្យស័ក្ដិដាក់ទៅ ដំណើរការលឿន។ ប៉ុន្តែប្រជាពលរដ្ឋក្រីក្រដែលលោកដាក់ គឺដំណើរការនីតិវិធីវាអូសបន្លាយរយៈពេលយូរ»។
មន្រ្តីអង្គការមិនមែនរដ្ឋាភិបាលយល់ឃើញថា មានសំណុំរឿងជាងច្រើនដែលត្រូវបានតុលាការផ្អឹបទុកមិនចាត់វិធានការ ជាពិសេសបណ្ដឹងពីជនរងគ្រោះ ក្រខ្សត់ សង្គមស៊ីវិល និងគណបក្សប្រឆាំងកម្រឃើញតុលាការលើកមកជំនុំជម្រះណាស់។ ក្នុងពេលជាមួយគ្នានោះ បើដើមបណ្ដឹងជាមន្ត្រីជាន់ខ្ពស់រដ្ឋាភិបាល និងឧកញ៉ាជាដើម សង្កេតឃើញថា តុលាការដំណើរការក្តីដោយឆាប់រហ័ស។
បើទោះជាមន្ត្រីសមាគមការពារសិទ្ធិមនុស្សយល់ថា សំណង់ដែលមន្ត្រីចូលនិវត្តន៍សង់មិនត្រឹមត្រូវ ដូចការស្នើសុំក្ដី ក៏លោក សូ សុវណ្ណារី ព្រមានថា លោកអាចនឹងប្ដឹងមួយជាន់ទៀត ប្រឆាំងលោក យី សុខសាន្ត ពីបទបរិហារកេរ្តិ៍ដែលលោកអះអាងថា មន្ត្រីការពារសិទ្ធិមនុស្សរូបនេះ ផ្សព្វផ្សាយបង្ខូចកេរ្តិ៍ឈ្មោះលោកតាមបណ្ដាញសង្គម៕
No comments:
Post a Comment