ដោយ៖ វង្ស សុម៉ាលីន | ថ្ងៃអង្គារ៍ ទី19 ខែវិច្ឆិកា ឆ្នាំ2013, VOD. Watch about Hang Meas TV's report here.
ពិធីបូជាសពរបស់តារាចម្រៀងនាងឈិន សុរ៉ាវី កាលពីល្ងាចថ្ងៃទី១៨ វិច្ឆិកា បានបញ្ចប់ដោយភាពក្ដុកក្ដួលបំផុត។ ជាមួយគ្នានោះ គេបានទាំងឮសមាជិកនៃក្រុមគ្រួសារសព និងភ្ញៀវកិត្តិយសជាអ្នកចូលរួមភាគច្រើន បន្ទសំឡេងរិះគន់យ៉ាងកងរំពងទៀតផង ប៉ុន្តែនោះមិនមែនជាការរិះគន់ចំពោះសព និងសាច់ញាតិ្តរបស់សពឡើយ។
ត្បិតថាវិញ្ញាណរបស់ឈិន សុខរ៉ាវី បានស្ងប់ចិត្ត ក្រោមវត្តមានរបស់ម្ដាយ ដែលធ្លាប់ដាច់ចិត្តទៅចោលពួកនាង និងឪពុក ទៅកសាងជីវិតថ្មីជាមួយស្វាមីក្រោយនៅប្រទេសបារាំងនោះ បានត្រឡប់មកធ្វើបុណ្យ ប៉ុន្តែឈិន សុខរ៉ាវី ក៏ពិតជាមិនទាន់ស្ងប់ចិត្តទាំងស្រុងដែរ ខណៈដែលស្វាមីលាក់មុខរបស់នាង មិនបានបង្ហាញមុខទាល់តែសោះ ចាប់តាំងពីនាងបានស្លាប់។ អំណះអំណាងរបស់ក្រុមគ្រួសារសព បានថ្លែងដោយអារម្មណ៍ក្ដុកក្ដួលថា បុរសដែលឈិន សុខរ៉ាវី បានរួមរស់ជាប្ដីប្រពន្ធលួចលាក់អស់ច្រើនឆ្នាំនោះ មិនបានបង្ហាញមុខឡើយ ដោយសូម្បីតែក្នុងថ្ងៃបូជាសពដែលត្រូវគេរំពឹងថា គេនឹងមកអុជធូបសុំខមាលទោសលើកចុងក្រោយ។ សាច់ញាតិ្តជាច្រើនរបស់សព បញ្ជាក់ដូចគ្នាថា កន្លងមកពួកគេមិនដែលពេញចិត្តនឹងវត្តមានរបស់បុរសជាមន្ត្រីយោធាដែលឈិន សុខរ៉ាវី ជ្រើសរើសនេះទេ ប៉ុន្តែមកពីម្នាក់ៗមិនចង់ជំទាស់ និងមិនចង់បំបែកបំបាក់ជីវិតស្នេហារបស់នាង ទើបពួកគេបិទភ្នែកបិទត្រចៀក បើទោះជាដឹងថា បុរសម្នាក់នេះ មានទម្លាប់ប្រើហិង្សា និងធ្វើឲ្យឈិន សុខរ៉ាវី ចង់សម្លាប់ខ្លួនម្ដងជាពីរដងកន្លងមក។ ពួកគេបានទាំងតាំងចិត្តថា បើក្នុងថ្ងៃសព បុរសម្នាក់នេះ បង្ហាញមុខមក ពួកគេនឹងមិននិយាយអ្វីទាំងអស់ ដើម្បីឲ្យវិញ្ញាណរបស់សព កាន់តែស្ងប់ចិត្តទៀតផង។ ប៉ុន្តែចាប់តាំងពីថ្ងៃនាងស្លាប់ រហូតមកដល់ថ្ងៃបុណ្យ៧ថ្ងៃ ដែលបានបន្តនៅថ្ងៃទី១៩ វិច្ឆិកានេះ គេមិនឃើញស្វាមីលួចលាក់របស់ឈិន សុខរ៉ាវី ដែលជាឃាតករចិត្តត្រជាក់ធ្វើឲ្យឈិន សុខរ៉ាវី គិតខ្លីនោះ លេចមុខឡើយ។ អញ្ចឹងហើយ ទើបអវត្តមានរបស់គេ ត្រូវគេរិះគន់យ៉ាងកងរំពងក្នុងថ្ងៃបូជាសព។ ទោះយ៉ាងណា បុរសនេះ ទំនងពិបាកប្រឈមផងដែរ ពិសេសក្នុងពេលដែលគេគឺជាអ្នកដែលធ្វើឲ្យ ឈិន សុខរ៉ាវី ត្រូវស្លាប់ និងមិនដែលផ្ដល់សុភមង្គលឲ្យនាង ក្នុងពេលរួមរស់ជាមួយគ្នាបែបនេះ។
(កញ្ញា ឈិន សុធារី ត្រូវជាប្អូនស្រី និងលោក ឈិន កុសល ត្រូវជាបងប្រុសសពកញ្ញា ឈិន សុខរ៉ាវី)
នៅថ្ងៃបូជាសពរបស់ឈិន សុខរ៉ាវី ដែលបានធ្វើឡើងនៅវេលាម៉ោងជាង៥ ល្ងាចនោះ គេឃើញបងៗ និងប្អូនៗរបស់នាងស្រែកយំរហូតដល់សន្លប់បណ្ដាក់គ្នា ដោយមានតែម្ដាយរបស់នាងម្នាក់ប៉ុណ្ណោះ ដែលទប់ជំហរបានល្អជាងគេ។ ចំពោះតារាសិល្បៈវិញ បានវត្តមានតិចតួចបំផុត ដោយមានតែតារាចម្រៀងប្រចាំហង្សមាស លោកសាពូន មីដាដា លោកយក់ ដួងតារា លោកស៊ិន ចាន់វាសនា លោកបញ្ញាសិទ្ធិ និងលោកឡេង ប៊ុនណាតប៉ុន្មានរូបប៉ុណ្ណោះ បានចូលរួម។ សភាពនេះ ក៏បង្កជាសំឡេងរិះគន់ផងដែរ នៅក្នុងពិធីបូជាសពដែលមិនសូវមានសភាពអ៊ូអរដូចកេរ្តិ៍ឈ្មោះក្នុងសិល្បៈរបស់សពកាលនៅរស់នោះ។ ដូច្នេះមានន័យថា សង្គមតារាសិល្បៈខ្មែរ មិនមានទម្លាប់ជួយគ្នាក្នុងពេលតារាដូចគ្នាមានទុក្ខនោះឡើយ បើទោះជាអ្នកចែកឋាននោះ គឺជាតារាម្នាក់ដែលមានឈ្មោះបោះសំឡេងក្នុងនាមជាតារាទៅហើយ។
ប៉ុន្តែបើក្នុងពិធីសើចសប្បាយ ដូចជាក្នុងពិធីមង្គលការ ក្នុងពិធីជប់លៀង ដែលតម្រូវឲ្យពួកគេអាចតែងខ្លួនស្អាតបង្អួតកាម៉េរ៉ា នោះទើបឃើញក្រុមតារាល្បីឈ្មោះភាគច្រើនលេចមុខរួមគ្នា។ នេះមិនមែនជាលើកទី១ទេ ដែលបង្ហាញថាចង្កោមតារានៅក្នុងសង្គមសិល្បៈខ្មែរ មិនចូលចិត្តសហការគ្នានូវអ្វីដែលមិនចំណេញ ពោលគឺសូម្បីតែការស្លាប់របស់តារាមុនៗ ក៏ត្រូវគេឮយ៉ាងសាំត្រចៀកផងដែរ ថាមកពីតារានោះមិនសូវជិតស្និទ្ធជាមួយគេ ឬទាល់តែតារានេះទើបស្និទ្ធស្នាលជាង។ តារាស្រុកខ្មែរ គួរតែឈឺឆ្អាលគ្នា ដោយឈប់លាបពណ៌ថា នោះជាតារាបែបបុរាណ នោះជាតារាបែបសម័យ ដើម្បីឲ្យគេមើលឃើញថា គ្រប់ពេលដែលតារាមានសុខឬមានទុក្ខ គឺពួកតារាភាគច្រើនស្រាក់ដៃជួយគ្នា ពិសេសចំពោះករណីស្លាប់របស់ឈិន សុខរ៉ាវី ដែលតារាស្រករមុន និងស្រករក្រោយភាគច្រើនសុទ្ធតែស្គាល់ច្បាស់បែបនេះ។ សំឡេងរិះគន់នេះ ត្រូវឮពេញពិធីថ្ងៃបូជាតែម្ដង។ ម្នាក់ៗនិយាយថា ឃាតកររបស់សពមិនមកគឺជារឿងមិនចម្លែកឡើយ ប៉ុន្តែចំពោះករណីដែលឈិន សុខរ៉ាវី ល្បីឈ្មោះប៉ុណ្ណឹងដែរ បែរជាគ្មានអ្នកសិល្បៈច្រើនឈឺឆ្អាល គឺជារឿងសង្វេគណាស់ ចំពោះតារាសិល្បៈខ្មែរ ដែលគ្មានវប្បធម៌ស្រាក់ដៃគ្នាទាល់តែ ក្នុងពេលតារាដូចគ្នាមានទុក្ខ៕
សរសេរមកកាន់ លោក វង្ស សុម៉ាលីន តាមរយៈ vongsomalin@yahoo.com
No comments:
Post a Comment