តំណាងរាស្រ្តសភាសហរដ្ឋអាមេរិក ប្រចាំរដ្ឋកាលីហ្វ័រនីញ៉ា លោក ដាណា រ៉ូរ៉ាបាគ័រ (Dana Rohrabacher)
Provided Photo
ក្នុងការជួបជុំស្វែងរកការគាំទ្រកាលពីចុងសប្តាហ៍មុន ពលរដ្ឋខ្មែរ-អាមេរិកាំងទាំងនោះ ក៏បានស្នើឱ្យតំណាងរបស់ខ្លួនជួយអន្តរាគមន៍ ឱ្យរដ្ឋាភិបាលខ្មែរជំរុញដំណើរការដោះស្រាយការជាប់គាំងផ្នែកនយោបាយនៅកម្ពុជា ប្រកបដោយយុត្តិធម៌។
សកម្មជនខ្មែរក្នុងក្រុងឡងប៊ិច លោក ទិត្យ ទិព្វផាន់ណា មានប្រសាសន៍ថា ការទាមទាររបស់ពលរដ្ឋខ្មែរ-អាមេរិកាំងទាំងនេះ ធ្វើឡើងបន្ទាប់ពីពួកគេបានឃើញហេតុការណ៍ដ៏រន្ធត់មួយចំនួននៅកម្ពុជា ដូចជាការវាយធ្វើបាបព្រះសង្ឃ និស្សិត និងបាញ់ប្រហារជនស្លូតត្រង់ទាំងកណ្តាលថ្ងៃ៖ «...សភាតំណាងរាស្រ្តអាមេរិកាំង គាត់មានអំណាចខ្លាំងណាស់ ហើយមានទឹកមាត់ប្រៃ អាចបញ្ចេញសំឡេងរបស់គាត់ ដើម្បីឲ្យ ហ៊ុន សែន ដឹងថា គេមិនពេញចិត្តនូវទង្វើររបស់លោក ដែលកំពុងតែធ្វើសព្វថ្ងៃនេះ ដែលធ្វើបាបប្រជាពលរដ្ឋខ្លួនឯង សម្លាប់ប្រជាពលរដ្ឋខ្លួនឯង។ ហើយសូមផ្តាំទៅប្រជាពលរដ្ឋក្នុងស្រុកឲ្យដឹងថា យើងនៅក្រៅស្រុក យើងមិនដែលព្រងើយកន្តើយទេ យើងតែងតែរកមធ្យោបាយ ហើយយើងតែងមានអារម្មណ៍ចុកចាប់ណាស់ ពេលឃើញសមត្ថកិច្ចវាយព្រះកេសលោកសង្ឃ វៃក្បាលប្រជាពលរដ្ឋដែលជាកូនក្មេង កូនខ្មែរនៅជុំវិញស្ថានការណ៍នយោបាយសព្វថ្ងៃក្តៅៗនេះ។ យើងឃើញភ្លាមៗ បងប្អូន យើងឈឺចិត្ត យើងឈឺចាប់ណាស់ យើងអត់នៅស្ងៀមបានទេ។ វ៉ៃព្រះកេសព្រះសង្ឃ វ៉ៃក្បាលប្អូន ដូចវ៉ៃក្បាលពួកយើងទាំងអស់គ្នានៅសហរដ្ឋអាមេរិកនេះដែរ។ ដូច្នេះ យើងអត់នៅស្ងៀមទេ យើងនៅតែរកមធ្យោបាយ ដើម្បីផ្តល់សេចក្តីស្រឡាញ់ដល់ប្រជាពលរដ្ឋរបស់យើងនៅក្នុងស្រុកឯណោះបាទ!»។
តំណាងរាស្រ្តសភាសហរដ្ឋអាមេរិក ប្រចាំរដ្ឋកាលីហ្វ័រនីញ៉ា លោក ដាណា រ៉ូរ៉ាបាគ័រ (Dana Rohrabacher)។ Provided Photo
តំណាងរាស្រ្តសភាសហរដ្ឋអាមេរិក ប្រចាំរដ្ឋកាលីហ្វ័រនីញ៉ា លោក ដាណា រ៉ូរ៉ាបាគ័រ (Dana Rohrabacher) បានថ្លែងថា រដ្ឋាភិបាលរបស់លោក ហ៊ុន សែន កំពុងធ្វើសង្គ្រាមជាមួយពលរដ្ឋរបស់ខ្លួន ហើយលោកសន្យាថា នឹងស្វែងរកការដាក់សម្ពាធដល់របបរបស់លោក ហ៊ុន សែន រហូតដល់មានដំណោះស្រាយសមរម្យជូនពលរដ្ឋ៖ «...ដើម្បីឲ្យពលរដ្ឋកម្ពុជាអាចរស់នៅប្រកប ដោយសុខដុមរមនា និងរស់នៅដោយគ្មានការភ័យទៅបានលុះត្រាតែ ហ៊ុន សែន ត្រូវតែចុះចេញពីអំណាចជាបន្ទាន់...»។
ក្រៅពីក្រុមតំណាងរាស្រ្តសភាសហរដ្ឋអាមេរិក ទាមទារឲ្យមានដំណោះស្រាយអំពីភាពជាប់គាំងផ្នែកនយោបាយនៅកម្ពុជានោះ រដ្ឋាភិបាលក្រុងវ៉ាស៊ីនតោន (Washington) សហគមន៍អឺរ៉ុប និងក្រុមប្រទេសម្ចាស់ជំនួយជាច្រើនក៏ចង់ឃើញដំណោះស្រាយប្រកបដោយតម្លាភាពដែលអាចជឿជាក់បាន។
កាលពីពេលថ្មីៗនេះ រដ្ឋាភិបាលរបស់លោក ហ៊ុន សែន ហាក់បន្ទន់ឥរិយាបទរបស់ខ្លួនក្នុងការស្វែងរកការចរចា និងស្វែងរកការជ្រោមជ្រែងពីប្រទេសជប៉ុន ដើម្បីឲ្យមានការកែទម្រង់ការបោះឆ្នោត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ៕
No comments:
Post a Comment